KFP husu Funsionáriu Kumpri regras Lisensa no Faltas

Iha Dekretu Lei nu.21/2011, 8 juñu- Lisensas no Faltas, nudar rejime ne’ebé atu hatur lolos kona-ba regras liga ho lisensas no faltas, Dekretu ida ne’e ninia intensaun mak atu klarifika kona-ba limites atu hetan lisensa no falta sira, no mos atu tipificar ka kualifikar, ninia efeitu oinsa, no mós kondisaun atu justifika, explika Sekretariu Ezekutivu Sekretariadu Komisaun Funsaun Públika Nelson Philomeno Regô de Jesus iha programa Povu Nia Matadalan iha studio Radiu METRO FM (23/06/2020) hodi sosializa kona-ba lisensas no faltas sira.

Iha Dekretu-Lei refere iha tipu lisensa oi-oin hanesan lisensa maternidade, lisensa parternidade, lisensa lutu, lisensa kaben, lisensa anual, lisensa estudu, lisensa la-hó vensimentu no lisensa espesial la-hó vensimentu ida ne’e mak hatur hanesan direitu funsionáriu sira nian.

Funsionarius ka ajentes ida atu konsede ka atu hetan lisesans no mós faltas sira iha obrigasaun tenke aprezenta meius, provas adekuadus ka bele mos respetivus dokumentus ne’ebé mak bele justifika ba ninia falta sira. Tuir DL 21/2011 alterasaun dahuluk ba dekretu lei numeru 40/2008, 29 outubru, hateten wainhira funsionariu ida moras liu loron tolu nia tenke aprezenta atestadu mediku.

“Falta ita fahe ba rua, mak falta la-ho justifikasaun no falta ho justifikasaun, falta la-ho justifikasaun mak pergunta ne’ebé mak refere tantu falta sira la-ho justifikasaun iha artigu neba temi loloos katak, lisensa ka falta sira ne’ebé mak la inklui ida ne’e konsidera falta. Tantu sira ne’ebé mak la aprezenta provas temi hanesan moras karik nia tenki aprezenta ninia atestadu mediku, maibé nia la aprezenta ida ne’e konsideradu hanesan falta.

Maibé ita mos hatur iha diploma ida ne’e katak, funsionáriu ka ajente ida wainhira nia komete falta ne’ebé la iha justifikasaun, entaun ita bele dehan katak, nia bele hasoru instaurasaun prosesu disiplinar ka deskontu ni saláriu bazeia ba grau salarial ida-idak ninian’’ hatutan Sekretariu Ezekutivu.

Sekretariu Ezekutivu mós konvida ba funsionariu sira, tantu kargu diresaun xefia sira iha ne’ebé deit atu kontinua hala’o ita nia dever tuir Estatutu Funsaun Públika kumpri nafatin regras lisensas no faltas mak hatur ona iha Estatutu no Dekretu-Lei refere.