Instituisaun haat kompostu husi Komisaun Funsaun Públika, Provedoria dos Direitos Humanos e Justiça, Inspesaun Geral do Estadu no Komisaun Anti Korupsaun hala’o vizita surpreza ba iha Diresaun Nasional Transporte Terestre (DNTT) ho objetivu atu haree lala’ok servisu DNTT nian iha âmbitu prevensaun no asegura funsionariu sira atu labele komete ba aktu korupsaun no prevensaun ba governasaun diak.
Durante inspesaun funsionariu sira relata mós sira nia preokupasaun ba Komisaun Funsaun Públika kona-ba servisu DNTT nian, tanba akontese funsionariu balun hetan pena disiplinar, la iha promosaun, nomeasaun no extensaun kargus diresaun no xefia, menus rekursu umanus tanba ne’e husu atu rekruta tan ema balun atu reforsa servisu DNTT nian.
Ekipa ne’e kompostu husi Komisariu Asuntu Disiplinar, António Freitas, Adjuntu KAK, José Sampaio, Adjuntu PDHJ, Miguel da Costa no IJE, Francisco de Carvalho akompaña husi Diretor Nasional Transporta no Terestre, Natalino do Rosario nomós ekipa tékniku sira husi instituisaun haat ne’e.
Inspesaun no vizita surpreza ne’e hala’o (10/07), iha DNTT Balide no DNTT Comoro, Dili.
