24 novembru 2023, Sekretária Ezekutiva Sekretariadu Komisaun Funsaun Públika reprezenta Prezidente Komisaun Funsaun Públika ensera kursu indusaun jeral faze daruak nian ba funsionáriu públiku iha Institutu Nasional Administrasaun Públika (INAP), Comoro, Díli.
Tuir Diretur Belarmino Amaral hateten katak,formasaun indusaun jeral ne’e realiza ba faze primeiru no faze segundu hamutuk total 286 pessoas iha totál funsionárius foun, ne’ebé mak tuir regras wainhira funsionáriu rekrutadu foun sira tuir kursu obrigatóriu hodi hatene regras, prosedimentu iha funsaun públika.
Ba faze daruak nian funsionáriu ne’ebé partisipa iha indusaun jeral ne’e hamutuk nain 146, kompostu husi feto nain 72 no mane 69, maibé iha final kursu ne’e totál partisipante hamutuk nain 141 de’it mak termina kursu indusaun jeral, dehan Belarmino Amaral.
iha tempu hanesan Sekretaria Ezekutiva Maria da Costa Oliveira nu’udar reprezentante Prezidente KFP iha enseramentu kursu indusaun jeral ne’e hateten, nu’udar funsionáriu presiza komprende sira nia atividade esensial sira hodi serbí ba púbiku hodi presta servisu ida di’ak ba públiku no kumpri ninia papél signifika serbí di’ak ba ita nia povu. Governu no KFP tau konsiderasaun no presiza proporsiona funsionáriu públiku sira husi oportunidade ba formasaun no aperfeisoamentu atu prepara ninia misaun lor-loron nian ho di’ak liu tan.
KFP sempre servisu hamutuk ho INAP no FDCH no liñas ministeriais sira ba implementasaun planu formasaun husi kada instituisaun atu bele fó kursu no formasaun sira ne’ebé adekuadu tuir nesesidade identifikadu. ho forma ne’e buka atu asgura funsionáriu públiku hotu hodi alkansa oportunidade ba formasaun sira ba iha dezenvolvimentu kareira hodi bele presta servisu di’ak lor-loron nian, dehan Sekretaria Ezekutiva.
Sekretaria Ezekutiva destaka liu tan presiza iha funsaun públika ida ne’ebé kapaz, produtiva.
“Presiza ita nia funsaun públika ida ne’ebé kapaz, produtiva, kria kultura inovasaun ida di’ak, aproveita teknolojia foun sira hodi aumenta efisiensia servisu, promove servisu ekipa no kolaborativu,” hateten Sekretaria Ezekutiva SKFP, Maria da Costa Oliveira.
Matéria sira durante kursu indusaun kona-ba deveres no direitus iha funsaun públika, jestaun arkivu, preparasaun dokumentus, komunikasaun no koordenasaun, no matéria sira seluk ne’ebé mak orador sira fó durante loron 20.
Enseramentu kursu indusaun ne’e fahe sertifikadu ba formandu sira mai husi kada Ministériu no kursu ne’e realiza kooperasaun entre INAP, KFP no Financia husi FDCH.
