Sekretariadu Komisaun Funsaun Públika reprezenta husi Diretor DNPQFP, Francisco da Costa Pereira, Senior Profesional Belarmino Filomeno Neves no Pontu Fokal Lorga dos Santos reuniaun ho reprezentante husi Governu Austrália nian iha sesaun briefing English Languague Training for ASEAN Accession (ELTAA) nian ba iha funsionárius públikus ne’ebé planea ba tinan lima nian ne’ebé hala’o iha Segunda-feira, 23 setembru 2024 iha salaun IED – MNEC.
Objetivu husi sesaun briefing ne’e nu’udar preparasaun adezaun Timor-Leste ba ASEAN, tan ne’e MNEC koopera ho embaixada Australia iha Dili hodi ko’alia kona-ba formasaun lian ingles ba funsionarius sira liu husi grupu Strategic Development Group (SDG) hodi konsulta ho parte prinsipal sira husi Governu Timor-Leste nian.
Husi enkontru ne’e reprezentante husi Governu Australia nian parte ba kursu ou formasaun ne’e sei realiza ba tinan lima nia laran, maibé husi sesaun briefing ne’e sei foti dadus husi linãs ministeriais sira oinsá atu prepara, dezeñu programa ida adekuadu ba iha kursu ne’ebé sei oferese husi Governu Austrália. Kursu ne’e sei planu oferese ba nivel senior sira, fó mós ba pontu fokal sira no funsionárius ba pilar importante tolu ASEAN nian hanesan, Pilar Sosiu Kultural, Pilar Ekonomia no Pilar Polítika Seguransa ninian, maibé hafoin enkontru ne’e ekipa sei halo survey ba dadus no sá área importante ne’ebé mak presiza atu dezeña tuir situasaun no área foku sira.
Husu mós ba KFP wainhira funsionáriu sira nia partisipasaun iha kursu lian inglês ne’e sá mekanizmu no regras ruma mak sei kesi funsionáriu sira hanesan komitmentu ida atu tuir kursu to’o remata.
Nune’e husi KFP ninia parte sei relata informasaun hirak ne’e ba Prezidente KFP no sei konvoka reuniaun ho nivel liñas ministeriais iha nivel Diretores Jerais atu bele haree área sira importantante mak atu define, hafoin ne’e sei prepara nota konseitu ida hodi entrega ba iha Governu Austrália ba dezeñu programa ne’e.
Iha reuniaun ne’e ekipa reprezentante Austrália sei foti ou rekolla informasaun sira ba iha formasaun ou kursu ne’e tuir kondisaun no situasaun, tuir área sira importante, hanesan diplomasia, kursu lian inglês ba nivel ne’ebé definidu no aprezenta hikas ba KFP hamutuk ho entidade sira hodi hetan aseitasaun.
Sesaun briefing ba dahuluk ne’e sei servisu hamutuk ho KFP, INAP, MNEK no Australia ba ELTAA.
