Komisaun Funsaun Públika hamutuk ho Komisaun Organizadora Ministériu Justisa halo abertura ofisial ba atividade expozisaun no bazar baratu iha âmbitu Loron Nasional Funsaun Públika ba dalima, ne’ebé hala’o horseik (25/06), iha Sentru Konvensoens Dili, Merkadu Lama.
Objetivu ba expozisaun no bazar baratu atu halo reflesaun ba loron ne’ebé Estadu atribui ho sentidu ida atu valoriza papel estratéjiku servidor públiku sira iha âmbitu servi ba povu no nasaun atu hodi akompana no lori povu ba iha moris prósperiedade
“Iha âmbitu ida ne’e hakarak fó parabéns ba MJ no ekipa organizadora nebe konsege define tipu atividade realiza tuir nia tempu no kalendariu, maske durante ne’e atividade balun lao tiha ona ne’ebé kulmina ho atividades desportivas. Nudar funsionariu no servidor públiku tanto ordem demokratiku no ordem birokratriku sai nu’udar oportunidade diak hodi halo reflesaun. Nudar funsionáriu públiku sente orgullu ao mezmu tempu presija iha reflesaun ba kritikas no faillansu sira husi públiku, expozisaun ne’e atu haree konkistas husi funsaun públika ne’ebé reprezenta husi sira ne’ebé mak durante ne’e hadau ona liu-liu iha tinan hirak nia laran no atividade sira ne’e hotu sei kulmina iha 15 jullu, loron nasional Funsaun Públika,”hateten Prezidente Komisaun Funsaun Públika, Faustino Cardoso Gomes.
Iha termpu hanesan Ministru Justisa apelu ba atividade expozisaun no bazar baratu ne’e atu funsionariu sira konsolida no servi diak liu tan iha servisu lor-loron nian hodi halo reflesaun ba dezafiu ne’ebé hasoru no prontu simu kritikas husi públiku hodi hadia prestasaun servisu.
“Nu’udar Ministru no Komisaun Organizadora ba Loron Nasional Funsaun Públika ba dalima, hau apelu ba funsionariu publiku tomak liu husi atividade ida ne’e atu funsionáriu sira konsolida espíritu atu serví ho diak liu tan iha ita nia servisu fatin lor-loron, espíritu, unidade atu halakon laran taridu hakotu dezafiu lor-loron no halo reflesaun klean atu hateke ba kotuk saida mak halo ona no hateke ba oin saida mak atu halo. Halo reflesaun saida mak atu hadia hodi fó vizaun, espíritu foun atu atende diak liu tan povu no nasaun nia deseju no ezijensia. Nu’udar funsionáriu públiku iha expozisaun ida ne’e prontu partilla informasoens no simu kritikas oioin husi liur, ho kritika sira ne’e bele halo reflesaun klean liu tan ba iha prestasaun servisu tuir ida-idak nia knar iha servisu fatin,” dehan Ministru Ministériu Justisa, Manuel Cárceres da Costa wainhira halo abertura ofisial ba atividade expozisaun no bazar baratu iha CCD, Merkadu Lama, Dili.
Partipa iha atividade ne’e Sekretariu Estadu Kooperativa, Prokurador Jeral Repúblika, Provedora no Adjuntu PDHJ, Komandante PNTL, Defensor Públiku Jeral, Adjuntu PSIK, Adjuntu KAK no dirijentes sira husi liñas ministeriais.
