Prezidente Komisaun Funsaun Públika, Faustino Cardoso Gomes lori Komisaun nia naran agradese ba VIII Governu, tanba konsege aprova ona proposta alterasaun rezolusaun husi Dekretu Lei numeru 01/2018, kona-ba Rejime Promosaun Kareira Iha Administrasaun Publika, liu-liu artigu 7.º ne’ebé sai nu’udar impedementu interpretasaun entre Gabinete Primeiru Ministru ho KFP kona-ba vagas promosaun. Hafoin rona esplikasaun husi Komisaun ikus mai Governu konsege ona aprova rezolusaun refere.
Hatan perguntas jornalista Prezidente KFP esplika, Dekretu Lei ne’e sai instrumentu operasional kona-ba definisaun numeru vagas tuir grau ida-idak nian.
Tamba ne’e bainhira Prezidenti da Repúblika promulga no publika iha jornal da repúblika sai ona rezolusaun ba definisaun vagas promosaun, KFP hahu servisu konkretus no tuir planu bainhira laiha mudansa ruma ba promosaun sei bele realiza iha fulan Abril tinan 2019.