Prezidente Interinu KFP, José Telo Soares Cristovão akompaña husi Diretor Nasional – Diresaun Nasional Forsa Traballu Mobilidade iha Funsaun Públika, Anita Tavares de Jesus halo enkontru ho Sekretariu Jeral, Cesar José da Cruz hamutuk Diretor Geral Ministériu Agrikultura hodi halo diskusaun kona-ba “Mobilizasaun Funsionariu iha Postu Administrativu no Munisipiu atu partisipa iha promosaun teste eletronika ne’ebé tuir planu sei hala’o iha loron 6 fulan agostu tinan 2019.
Prezidente Interinu KFP hanesan mós Komisariu ba asuntu Formasaun SIGAP no Forsa Traballu hateten, senti triste tamba Ministru Agrikultura rasik la marka prezensa no delega deit Sekretariu Jeral no Diretor jeral sira. Tamba mobilizasaun funsionariu mai husi postu no Munisipiu mai Dili sei responsabiliza husi Ministeriu ida-idak nian.
Materia teste promosaun ba grau hot-hotu maka hanesan Administrasaun públika, Finansas, Konstituisaun RDTL, Legislasaun Funsaun Públika, língua portuguesa no língua tetum. Enkuantu perguntas ba kada grau maka sei iha diferente. Tamba ne’e KFP husu ba rekursu umanos kada Ministeriu fó informasaun ba funsionariu hotu atu kompriende ho diak nuneé bele mai partisipa iha teste promosaun.
Sekretariu Jeral MAP Cesar Jose da Cruz hateten, sei hato’o relatoriu eskrita resultadu enkontru ne’e ba Ministru Agrikultura atu foti desizaun.
Enkontru ne’e hala’o horseik (18/06) iha Sala enkontru MAP, Comoro, Dili.