Tersa-feira, 30 Jullu 2024 – Prezidente no Komisarius Komisaun Funsaun Públika hamutuk ho Sekretária Ezekutiva reuniaun ho Ministru Prezidénsia Konsellu Ministru ko’alia kona-ba prioridade mandatu dahaat nian no reforma iha administrasaun públika iha Timor-Leste.
Ligadu ba prioridade mandatu dahaat nian, Prezidente KFP Agostinho Letêncio de Deus hatete, planu reforma obrigatóriu ida ne’e atu hatan ba programa nonu Governu ne’ebé mak dehan sei hahú ho reforma ba Administrisaun Públika, Funsaun Públika, prosesu kapasitasaun.
Tuir observasaun husi Governu dahaat mai kuandu halo reforma husi parte balun de’it no parte balu la’e tan ne’e KFP iha hanoin ida halo reforma total ne’ebé hahú kedas husi funsionáriu rekruta mai até reforma, planu ne’e KFP aprezenta hotu ona ba ministru sira no hein komentariu polítiku nian antes halo lansamentu, dehan prezidente KFP.
Iha tempu hanesan Ministru PCM Ágio Pereira subliña, tuir observasaun iha mudansa barak tuir sirkulasaun polítika, rejime kontratu sira tenki iha rejime reguladu ida atu nune’e bele akomoda sira ne’ebé mak iha esperiénsia uza hodi kontribui ba Estadu.
Alende ministru PCM fó ideia lubuk ba KFP atu haree’mós kontratadu sira atu nune’e tuir sistema nasaun viziñu (Australia no Indonesia) nian hodi nune’e bele kria rejime revitalizasaun ida ba kontratatu sira.
Reuniaun ne’e remata ho entrega Relatóriu Anual versaun (Lian Tetun no Lian Portuguez), Relatóriu Rezultadu Diagnóstiku, Planu Reforma Jestaun Rekursu Umanu Timor-Leste no mós entrega bulletin hatan perguntas husi deputadu sira kona-ba Relatóriu Annual no reuniaun ne’e hala’o iha sala reuniaun PCM iha Palásiu Governu, Dili.
