Sesta feira, 12-08-2022, Inspetora Komisaun Funsaun Públika, Sonia da Silva Soares reprezenta Komisaun Funsaun Públika partisipa serimónia tomada de pose ba funsionáriu foun IADE nain 5 kompostu mane 4 feto 1.
Inspetora Sonia da Silva Soares reprezenta Komisaun Funsaun Públika, husu ba emposadu nain 5 ne’ebé simu knár foun hodi sai servidor Estadu atu serví povu tuir objetivu instituisaun nian, tenke tau aas integridade mak prinsipal iha Estatutu Funsaun Públika.
Responsabilidade sira ne’e liga ho dever jerais no dever espesiais tuir kódigu étika ne’ebé mak tenke kumpri, la’o tuir lei, kumpri ba regulamentu, regras no prosedimentu sira tuir juramentu ne’ebé mak hala’o tiha ona, kumpri ba orientasaun superior nian, tenke serví ho integridade, labele tau aas interese privadu liu interese nasaun. Husu ba emposadu sira, nu’udar funsionáriu no servidor Estadu, tenke tau aas interese estadu ba servisu hamutuk ho profisional no responsabilidade.
Esklarese inspetora KFP.
Iha tempu hanesan Ministru Koordenador ba Asuntus Ekonómikus, Joaquim Amaral iha ninia diskursu hateten, funsionáriu nain lima ne’ebé simu ona pose no asina termu aseitasaun atu kompleta kuadru pessoal IADE nian. Iha juramentu ne’e hanesan, aktu solene ne’ebé ho sentidu todan tebes, relasiona ho kareira profisional, rekere no ezije atu bele serví ho profisional.
Enkuantu, Ministru MKAE lori Governu nia naran parabeniza funsionáriu foun nain lima ne’ebé simu ona pose ba vida profisional, vida familiar atu bele kontribui, hamutuk ho IADE hodi dezenvolve ita nia nasaun. No hato’o mós parabéns ba KFP ho nia apoiu tomak, juri no ekipa tomak ninia kontribuisaun ba prosesu naruk, kommpetitivu, seletivu, ikus mai konsege liu prosesu sira ne’e.
Tuir diretur ezekutivu IADE nu’udar Prezidente juri, relata relatóriu badak kona-ba prosesu rekrutamentu ne’e la’o ho di’ak. Ba kandidatu ne’ebé mak tuir vaga, hatama dokumentus hamutuk 2,022 no liu iha seleksaun dokumentus hamutuk 123, hafoin teste eskrita liu nain 17, hodi kontinua ba prova oral ema nain 11 ne’ebé simu ona posse iha fulan maiu nia laran.
Hafoin posse ba faze primeiru konklui, kontinua loke prosesu ba faze daruak nian mak ekipa simu dokumentu ema hamutuk nain 45 ba vaga lima, ba prosesu ne’e passa husi prosesu eskrita hamutuk 38 no ba prosesu prova oral ninian hamutuk ema nain 5 mak konsege sertifika an hodi liu iha prosesu rekrutamentu ne’e.
Serimónia tomada de posse no asinatura termu aseitasaun hala’o iha salaun IADE, rua Dom. Boaventura Mandarin, Díli.
