Tersa feira, 21-02-2023, Komisáriu KFP asuntu disiplinar, Fausto Freitas da Silva akompaña husi Sekretária Ezekutiva Sekretariadu Komisaun Funsaun Públika partisipa serimónia asinatura termu aseitasaun ba funsionáriu foun MNEC nain 3 iha salaun Nobre MNEC Praia dos Coqueiros.
Komisáriu Komisaun Funsaun Públika, Fausto Freitas da Silva iha ninia intervensaun diskursu ba iha serimónia ne’e hateten, emposadu sira ofisialmente sai ona servidor públiku Estadu nian atu servi povu no nasaun tuir kompromisu de onra ne’ebé mak emposadu sira jura atu tane aas interese públiku, servi povu ho onestidade, profisionalizmu, imparsialidade no salvaguarda interese nasaun nian.
Komisáriu KFP enkoraja emposadu sira, atu hala’o servisu ho profisional, tane as prinsipiu no valor Administrasaun Públika ninian, liu-liu atu kumpre dever sira hotu ne’ebé define ona iha Estatutu Funsaun Públika, hodi hala’o servisu ho imparsial labele hali’is ka hamosu favoritizmu ne’ebé haree husi kor polítika, klase sosial nsst.
Komisaun Funsaun Públika iha prontidaun atu fó apoiu ba iha Ministériu hotu-hotu iha prosesu rekrutamentu tomak hodi garante imparsialidade no mós evita intervensaun polítika sira hodi asegura katak, administrasaun públika harii ho baze ida-ne’ebé forte no permanente, hanesan “Governu sei bele troka, ida mai no ida seluk ba, maibé funsaun públika nafatin kontinua eziste hodi asegura kontinuidade servisu atendimentu ba públiku”
“Ba Emposadu sira ne’ebé foin hetan posse, enkoraja ita boot sira atu hala’o funsaun sira ho kapasidade servisu ho méritu, profisional, halo atendimentu públiku ho di’ak, asegura transparansia, kria komunikasaun di’ak ho superior no mós subordinadu sira, evita hahalok sira ne’ebé bele hamosu konflitu interese, servisu ho imparsialidade liu-liu tenke hatene separa kestaun polítika partidarizmu nian ho servisu Administrasaun Públika nian no mós hadook an hosi hahalok korrupsaun sira.
Lori KFP nia naran kongratula ba MNEK ho vontade tomak realiza rekrutametnu ne’e, painel juri no ekipa tékniku ninia kolaborasaun ba servisu hamutuk no espesialmente ba emposadu sira no hein katak ho espíritu no motivasaun foun ne’ebé ita boot iha, sei sai servidor ida diak no ezemplar hodi presta servisu ida ho alta kualidade ba ita nia Estadu no povu Timor-Leste”.
dehan Komisáriu asuntu disiplina iha Funsaun Públika.
Iha tempu hanesan Ministra Negósius Estrangeirus no Kooperasaun, Adalgija Magno iha ninia diskursu hateten, ha’u pessoalmente orgullu teb-tebes, tanba husi mil ital aplikantes sira, nain tolu mak liu, dehan katak, sira iha duni dedikasaun no hakarak aprende no estuda duni hodi bele passa iha teste sira ne’e no hakarak atu sai funsionáriu MNEC ninian.
“Ita presija funsionáriu barak liu tan maibé ita hot-hotu hatene katak, iha prinsípiu ita sai ona membru ASEAN ita sai observador, espera katak, depois asinatura termu aseitasaun ba sira nain tolu bele aselera lalais prosesu rekrutamentu funsionáriu foun MNEC nian sira seluk tuir mai hodi nune’e sira bele priense fatin sira ne’ebé mak MNEC presija, hodi hamutuk ho liñas ministeriais sira seluk hodi implementa akordu sira ne’ebé sai plenos poderes ba ASEAN nian,”
hateten Ministra MNEK.
Alende ne’e Ministra mós enkoraja, hakarak sai diplomata bele aplika hodi integra iha MNEK ne’ebé mak kredivél.
