Prezidente no Komisárius Komisaun Funsaun Públika enkontru ho Ministru MOP hodi diskute kona-ba situasaun no estatutu funsionariu EDTL E.P.
Enkontru ne’e KFP informa no atu haree lisuk kona-ba situasaun EDTL E.P ne’ebé mak funsionáriu sira hato’o ba KFP kona-ba sira nia estatutu lisensa sem vencimento, avaliasaun dezempeñu, no karik sira lisensa remata sira fila fali ba Ministériu.
“Haree ba kestaun EDTL E.P no BTL E.P, maske administrasaun indireta la’o daudaun ona ho ninia sistema rasik, goja autonomia finanseira, autonomia jestaun, autonomia patrimonial no sira seluk tan, maibé ami entende katak, ministeriu obras publika seu iha kompetensia liu husi dalan ida naran tutela administrativa. Ba asuntu importante ne’ebé mak mai ita atu haree lisuk hodi fó hanoin ba malu mak situasaun funsionarius públikus ne’ebé mak servisu iha administrasaun indireta sira, neste caso EDTL E.P no BTL E.P, tanba KFP akompaña katak, EDTL ninia situasaun to’o ohin loron tama loloos ba rejime apropriadu ba natureza institusional E.P. Katak, to’o ohin loron funsionariu públiku sira kuaze atus lima (469) mak oras ne’e asegura hela funsionamentu kontinuidade servisu liga ho EDTL ninian, sira ema profisionais, tékniku, ema sira ne’ebé mak iha tinan naruk tiha ona hetan investimentu, Estadu buka atu hasa’e sira nia kapasidade hodi hariku liu tan esperensia, koñesimentu, kapasidade, abilidade téknika ida. Di’ak ida tanba, imi bele halo aproveitamentu ba sira, maibé tanba ezijensia rejime ne’ebé mak buka atu dezenvolve hodi asegura funsionalidade EDTL E.P,” esplika Prezidente KFP iha enkontru ho Ministru Obras Publika, iha ninia gabinete iha (23/08).
Iha fatin hanesan, Komisaria Maria de Jesus Sarmento reforsa mós kona-ba situasaun reforma, tanba sira preokupa ho sira nia pensaun, tanba sira atu ba ne’ebé de’it mós sira nia seguransa sosial iha nafatin, tanba ita nia rejime ne’e rejime universal, entaun ita nia partisipasaun la’ós de’it funsionalizmu públiku no ba fatin seluk mós wainhira instituisaun seluk kontrata iha fatin seluk nafatin iha direitu ba seguransa sosial.
NoKomisariu Fausto Freitas da Silva toka mós kona-ba avaliasaun dezempeñu, funsionáriu públiku wainhira koloka hikas ba, sira labele hasoru dezafiu iha tempu ikus.
Hatan ba situasaun ne’e Ministru MOP, Abel Pires hateten, prontu kolabora ba saida de’it hodi hadia atendimentu ba instituisaun p’ubliku sira. Nune’e, oinsá buka dalan atu rezolve situasaun ne’e no hanesan responsavel ba hadia di’ak liu tan.
Tuir informasaun, lisensa sem vencimento ba funsionáriu ne’ebé daudaun ne’e iha EDTL E.P sei remata iha fim dezembru tinan ne’e, tanba ne’e KFP husu ba MOP atu haree lisuk situasaun funsionáriu hirak ne’e.
“Oinsá ho sira nia situasaun lisensa sem vensimentu ne’ebé iha fulan dezembru agora konklui ba tinan 2, tuir lei lisensa sem vensimentu ba tinan rua no sei bele extende tan ba tinan ida, maibé se karik por konveniensia, urjensia servisu tinan tolu lisensa sem vensimentu bele extende tan. Será que sira remata tiha tinan 2 sira fila hikas ba ministeriu ka oinsá, situasaun ida ba lisensa sem vensimentu. Tanba KFP iha esperensia kazu ANATL I.P no AACTL I.P ninian husi MTK, MOP ninia parseiru uluk nebe haketak tiha,” esplika Prezidente KFP liga ho esperensia ne’ebé KFP iha.
Durante enkontru Prezidente KFP alerta no destaka mós kestaun sustentabilidade finanseira, ba sira ne’ebé mak iha ne’ebá hakarak fila hikas ba funsionalizmu públiku ninian, ne’ebé mak ami tenta esplika ba sira, presiza iha duni komunikasaun nivel altu, nivel polítika ninian, alende teknikamente ho administrasaun direta maibé instituisaun tutela mós importante tebes. No hato’o ba malu oinsá ba oin, situasaun konforme polítika ministériu ninian ligadu ho EDTL E.P ninian, no mós BTL EP ninian.
Alende ne’e sita mós kazu BTL ninian, KFP servisu hamutuk ho diresaun jeral BTL, funsionáriu sira ne’ebé mak uluk la halo aproveitamentu, halo fali rekolokasaun ba iha ministeriu sira ne’ebé mak hatudu interese atu uza sira. KFP koloka ona funsionáriu lubun ida mak ba autoridade munisipal Dili, depois ba fali MOP no sira seluk. Maibé EDTL ninian, totalmente sei nafatin asegura kontinuidade funsionamentu EDTL ninian maibé, sira preokupa ho kestaun sira ne’e. Ida ne’e mak ita buka atu partilla hamutuk no rona atu oinsá polítika MOP nian ba oin ligadu ho rekursu umanus, KFP buka komunika ho konsellu administrativu, konsellu ezekutivu hodi haree lisuk ba situasaun ne’e, alerta balun atu labele prejudika ba servisu individual, nune’e mós nivel institusional ne’ebé afeta ba ahi no buat sira ne’e hotu too agora seidauk rezolve hotu.
