13 Juñu 2022, Komisaun Funsaun Públika, Institutu Nasional Administrasaun Públika (INAP) ho UN Development Program (UNDP) Timor-Leste asina MoU ho objetivu atu hasa’e kapasidade funsionáriu públiku nian iha nasional no munisípiu sira liu husi E-Learning. Inisiativa ne’e mai husi apoiu konjunta entre projetu ne’ebé implementa husi UNDP “Hametin Dezzenvolvimentu Lokal INtegradu liu husi kapasidade autoridade munisipal iha Timor-Leste no Salva guarda komunidade rural no sira nia riksoin husi dezastre kauza husi mudansa klimátika” ne’ebé finansia husi Uniaun Europeia iha Timor-Leste fundu husi GCF.
Iha intervensaun Prezidente KFP, asinatura akordu ne’e sei implementa másimu husi INAP hanesan instituisaun ida ne’ebé responsavél ba formasaun nian espesialmente ba funsionáriu públiku, oinsá atu eleva liu tan sira nia koñesimentu, abilidade no oinsá funsionáriu sira promove liu tan sira nia an iha atendimentu públiku.
Nune’e toka mós kona-ba promosaun ne’ebé mak funsionáriu públikus sira liu husi teste eletróniku, tanba ne’e KFP konsidera realidade ema nian ba uzu komputador, lahatene uza komputador, tanba agora iha teknolojia avansadu maioria la uza ona telemovel alkatel no maioria uza telemovel android, ne’e atualmente timoroan sira mós atualiza sira nia an liu husi avansus teknolojia, maibé realidade mós infraestrutura rede internete ne’ebé mak sai hanesan problema iha Timor maibé, tenta atualiza an ba iha meius sira avansus teknolojia nian.
Alende ne’e Prezidente KFP agradese ba Ministru PCM, Ministru MAE no Embaixador Uniaun Europeia ne’ebé hamutuk iha ne’e hodi sai testamuña ba asinatura akordu ida ne’e.
KFP no INAP sei sai hanesan nain ba plattaforma E-Learning ne’ebé mak estabelesidu hamutuk entre Coursera, nu’udar fornesedor kursu online nian no Institute of Business (IOB) ho formasaun sira 32 hanesan jestaun finansas públikas, informasaun, komunikasaun no teknolojia, integrasaun jéneru, infraestrutura eskala-kiik ba klimátika, jestaun projetu no sistema informasaun jeográfiku no formasaun sira seluk.
Serimónia asinatura MoU ne’e marka prezensa husi Ministru Prezidensia Konsellu Ministru, Fidelis Manuel Leite Magalhães, Ministru Administrasaun Estatal, Miguel de Cavalho, Embaixador Uniaun Europeia, Andrew Jacobs, Diretor Ezekutivu UNDP, Munhktuya Altangerel, Prezidente KFP, Faustino Cardoso Gomes, Komisáriu portfóliu disiplinar, Fausto Freitas da Silva, Komisáriu portfóliu Planeamentu Forsa Traballu, Avaliasaun Dezempeñu, Formasaun no Dezenvolvimentu, António Freitas, Komisária portfóliu Finansas, Baze Dadus iha Funsaun Públika, Pensaun, Reforma, Protokolu no Komunikasaun, Maria de Jesus Sarmento, Komisária portfóliu Rekrutamentu, Promosaun, Seleksaun no Kareira iha Funsaun Públika, Carmeneza dos Santos Monteiro, Sekretária Ezekutiva SKFP, Maria da Costa Oliveira, Diretor Jeral INAP, Agostinho Letêncio de Deus, Diretor Nasional Planeamentu Kuadru Pesóal iha Funsaun Públika, Reitor IOB no xefes departamentu sira, inklui diretores no xefes husi ministériu relevantes.
Serimónia asinatura ne’e realiza iha salaun Delta Nova, Comoro, Díli.