Partisipasaun Prezidente Komisaun Funsaun Públika Sr. Agontinho Letêncio de Deus akompaña husi Sekretaria Ezekutiva SKFP no Xefe Gabinete ba Prezidente no Komisariu, partisipa iha Simeira Anual Mundial kona-ba Governu ba dala sanulu resin rua (12 Annual World Government Summit) mak hala’o iha Dubai, Emirados Árabes Unidos, hahú husi loron 11 to’o 13, fulan fevereiru 2025.
Objetivu husi simeira global ne’e atu lori hamutuk líderes nasaun sira, organizasaun internasional, peritu husi mundu tomak hodi ko’alia no partilla mós sira nia perspetiva hodi promove kooperasaun internasional, identifika solusaun inovadoras ba dezafius futuras. Nune’e atu inspira no kapasita jerasaun governu foun sira tuir mai hodi bele fó atendimentu di’ak no efisiente. No oinsá utiliza ka aplika Sistema Artifisial Intelegente (AI) hodi bele halo governasaun ida efetivu liutan liu husi hamenus durasaun atendimentu ba sidadaun sira no habadak birokrasia.
Ba loron dahuluk 11/2/2025, delegasaun akompaña husi Embaixador Timor-Leste ba Emirados Árabes Unidos (EAU), Rui Manuel Hanjam partisipa iha sesaun abertura (opening remarks) ho nia tema “shaping a better future for humanity” ne’ebé loke husi Minister of Cabinet Affairs no Prezidente Komisaun Organizadora ba Eventu Simeira Mundial kona ba Governu (World Governments Summit) husi Emirados Árabes Unidos, Sr. Mohammad Al Cergawi.
Iha sesaun diskusaun meja redonda, diskusaun painel no aprezentasaun ligada ho sub-tema sita hanesan: Emerging Global Influence, Financing the Future, Government Efficiency, Artificial Intelligence (AI) and Technology no tópiku sira seluk mak ajendada ona.
Hafoin sesaun abertura, kontinua ba rona aprezentasaun debate husi peritu sira ligadu ba Government Efficiency ba tópikus relevante sira “From Data to Decisions: Government Efficiency in Times of Crisis no Future Leadership: Driving Efficiency and Government Policies”.
Ba loron daruak, ekipa KFP kontinua akompaña S.Exa. Vise Primeiru-Ministru no Ministru kordenador ba Asuntu Ekonomia no Ministru Turizmu no Ambiente, Francisco Kalbuadi Lay partisipa no sai mós orador prinsipal ba iha sesaun meja redonda ho tema Shaping Future Governments Ministerial Round Table I “Effective Governance and Crisis Resilience”.
Iha okaziaun ne’e Komisaun Organizadora fó biban ba S. Exa. Vise-PM Timor-Leste hodi hato’o intervensaun molok hahú ho aprezentasaun husi nasaun 17 mak hola parte iha sesaun ida ne’e.
Entretantu iha tempu hanesan Prezidente KFP hanesan mós orador halo aprezentasaun minutu lima (5) liga ba Administrasaun Públika Timor-Leste ninia perspetiva ba tema kolokada.
Eventu ne’e hetan partisipasaun másimu husi Prezidente no Primeiru Ministru no Vise Primeiru-Ministru sira husi nasaun 30, ne’ebé kompostu husi membru governu sira hamutuk 400, lideres organizasaun husi organizasaun internasional sira 80, no delegasaun ka reprezentante delegasaun guvernu 140 no partisipantes ba iha eventu ida ne’e hamutuk 6000.
Iha okaziaun ne’e Prezidente KFP agradese ba apoiu no asistensia tomak husi Ministériu Negosius Estranjeiru no Kooperasaun RDTL, Embaixada Timor-Leste ba Emirados Árabes Unidos (EAU) – Embaixador Rui Manuel Hanjam, Conselheira-Maria Mesquita, 3ª. Sekretária-Sujiana Araújo no Konsul Jeral iha Bali.
