Dili, 18 Outubru 2021 – Komisaun Funsaun Públika halo lansamentu abertura ba teste eskrita promosaun pesoál online ba Rejime Jerál Kareira iha Funsaun Públika ba datoluk iha Ministeriu Negosiu Estranjeiru no Kooperasaun.
Iha diskursu Prezidente Parlamentu Nasional tau atensaun ás ba promosaun ne’e importante tebes ba funsionáriu públiku sira tanba, rona keisa sira tama mai iha tempu barak nia laran la iha promosaun ba grau, tanba ne’e KFP realiza promosaun sentralizadu hodi hasa’e grau funsionáriu sira nian. Liu husi teste sistema online ne’e atu diminui favoritizmu, transparansia, garante imparsialidade ba servisu públiku, profisionalizmu, integridade iha Funsaun Públika no solusaun kriativa, inovadora husi KFP. No sai mos importante insiativa ba modernizasaun administrasaun públika timorense nian, hau propoin mos ba KFP ida ne’e la’os ba deit promosaun maibé uza mos ba teste sira seluk iha nivél servisus públikus seluk. Tanba parlamentu mos interese ho sistema ne’ebé funsiona nune’e, ba oin kargus sira parlamentu nian bele mos loke konkursu husi rai laran no ba rai liur bele konkore.
Ministra MNEK agradese tebes ba KFP tanba aseita proposta MNEK nian hodi bele realiza teste online ba funsionáriu sira ne’ebé mak hala’o hela misaun servisu iha estranjeiru.
Ministra realsa, funsionárius nain 38 husi MNEK ho diferente grau ne’ebé mak bele fo tempu hodi atende konkursu via online ba dahuluk, ne’ebé mak dezenvolve husi KFP, mekanizmu foun ida ne’e oinsá atu fasilita pesóal sira iha rai liur ein termu efikasia, efisiensia iha nivel hot-hotu, prinsipalmente oinsá halo poupansa ba tempu no osan. Sistema konkursu online ne’e hanesan instrumentu digital ida ne’ebé mak efisiente no efikasia tebes ba iha nivel Administrasaun Públika ba melloramentu prestasaun servisu ba públiku.
Iha âmbitu ne’e KFP atu asegura direitu funsionáriu públiku, tinan ne’e fó mós biban ba funsionáriu públiku husi Ministériu Negósiu Estranjeiru no Kooperasaun ne’ebe hala’o misaun servisu iha rai liur, hanesan iha embaixada no konsuladu sira. Total kandidatu ne’ebé sei tuir teste on-line hamutuk 38 kompostu husi Diploma no tékinku sira husi nasaun hamutuk 19 no sidade 24.
Iha tempu hanesan Prezidente KFP informa bazeia ba dadus kandidatu elejibel ne’ebé tuir teste ba tinan ne’e promosaun hamutuk 8706 ne’ebe sei konkore ba vaga hamutuk 878. Hakarak informa katak husi totál lista mak iha, hafoin halo tiha verifikasaun ikus mai hetan lista finál ho totál kandidatu finál hamutuk 8706 kompostu husi (feto 2214, Mane:6492)
Liga ho situasaun pandémika ne’ebé mak dadaun ne’e ita hasoru, teste promosaun sei hala’o iha turnu tolu no kada turnu sei simu 100 kandidatu, núdar forma ida ba kumprimentu regra protokolar covid-19 nian.
Iha mós rekezitu sira seluk ne’ebé kandidatu sira presiza sira kumpri wainhira mai halo teste mak mai lori kartaun vasina kompleta no vasina dala ida nian tenke lori rezultadu teste swab.
Partisipa iha serimonia abertura ne’e husi Prezidente PN, membru governu sira balun VIII Governu Konstitusional, embaixador Australia, IJE, PDHJ, KAK, DFAT no diretores jerais nivel instituisaun públiku.
