28 Setembru 2020– Komisaun Funsaun Públika realiza serimonia asinatura termu aseitasaun ba dahuluk ba Profisionais Seniores nain 8 iha Administrasaun Públika Timor-Leste.
Prezidente Komisaun Funsaun Públika (KFP kongratula no fo parabéns ba ministériu saúde ne’ebé mak disponibiliza fatin ba realizasaun serimonia, agradese Padre Evaristo Fernandes ne’ebé fó tulun iha serimonia ida ne’e no reflesaun liu husi reza no hananu husi koru SKFP nian ba hinu nasional Pátria no mós marcha Funsaun Públika, agradese painel juri no ekipa tomak ba realizasaun kareira profisionais seniores.
Akresenta Prezidente KFP klaru! Nain 8 mak sai nudar bintang iha prosesu ida ne’e, rejime foun iha Administrasaun Públika Timor-Leste nian, se nain 8 mak tuir juramentu no asina termu aseitasaun são primeiro conquistadores desta regime.
“Katak, são primeiro conquistadores desta regime. Rejime ida sai nudar espetavativa iha tempu naruk hodi hatan oinsá aproveitamentu ba tekniku profisional sira ne’ebé mak tinan ba tinan Estadu investe liu husi titular kargu iha Administrasaun Públika. Rejime ida fó biban ba sira atu iha tempu oin mai kontinua proklama sira nia kompetensia, kontinua konkista ba bebeik susesu tuir área kompeténsia ida-idak ninian, apenas formalizasaun ba prosesu naruk ida ho rekrutamentu hodi realiza konteúdu husi Dekretu Lei 22/2017, rejime kareia profisional senior iha Administrasaun Públika Timor-Leste,” akresenta Prezidente KFP, Faustino Cardoso Gomes iha nia diskursu iha salaun Ministériu Saúde, Palácio das Cinzas, Caicoli.
Prezidente esplika liu tan, “Durante pertense instituisaun ne’ebé mak abriga imi servisu ba, maibé hahu ohin ba oin formalmente imi halo parte husi KFP, imi hatene tiha fatin servisu sai nanis ona nudar imi nia habitat durante ne’e husi KFP fiar katak, fatin servisu la’os foun ba imi. Imi hatene ona dinámiku sira mak la’o iha ne’eba, ambiente servisu ne’ebé mak dezenvolve iha ne’eba, kultura servisu ne’ebé la’o, funsiona iha ne’eba. Signifika la iha bareira, la iha konstranzimentu psikolójika, wainhira hahu destaka án, hatudu realiza kompeténsia ne’ebé imi iha, maibé ho mekanizmu foun. No Komisaun sei halo akompanamentu konstante ba imi nia realizasaun kompeténsia iha fatin ida-idak tuir área kompeténsia ida-idak,” esplika Faustino Cardoso Gomes.
Tanba ne’e aproveita momentu ida ne’e alerta no husu ba emposadu profisionais seniores atu sai vizilante nafatin atu oinsá labele monu iha tentasaun ba dinámiku sira ne’ebé mak hamosu preokupasaun husi publiku, entidade sira ne’ebé tau iha risku kualidade prestasaun apoiu tékniku sira.
Iha tempu badak KFP sei buka meiu hodi halo audiênsia ho superior másimu sira, atu oinsá mak destaka sira nia atensaun kona-ba profisionais seniores sira nia prezensa nu’udar tékniku profisional senior ao mesmo tempo ba oin haree mós dezempenu servisu inklui avaliasaun dezempenu.
Iha tempu hanesan Komisaria Maria de Jesus Sarmento hateten, rejime ida ne’e rejime foun iha Administrasaun Públika Timor-Leste nian pela primeira vez ba ema nain 8 tuir vaga 12 no tuir kuota 10% ba nivel DJ no ekiparadu sira, husi 12 vagas konsege prense vaga 8 no sei falta vaga 4, no iha tinan-tinan KFP simu vaga 12 ne’ebé mai husi ministeriu sira. Ida ne’e oportunidade ba ministeriu hot-hotu atu bele konkore wainhira iha nesesidade ba iha profisionais seniores ho kareira transversal, multidisiplinar iha administrasaun públika, ema sira nebe mak prontu ona atu bele fo sira nia apoiu tomak ba iha ministeriu ba area espesialidade sira nebe mak sira hatur an ba.
Komisaun Funsaun Públika fo sai total vaga 12 bazeia ba nesesidade linhas ministeriais hanesan MSSI, MAP, MAE, PDHJ, INAP, MTK, MEKAE no KFP rasik no Komisaun Funsaun Públika simu total kandidatu hamutuk 159 ba vaga 12 no kandidatu ne’ebé elejibel ba prova eskrita hamutuk nain 58 (36%) no 101 (64%) la prense rekezitus.
Vaga ne’ebé preenxidus husi total kandidatu nain 8 ne’ebé mak klasifikadu ba vaga espesializada mak Eugenio João Amado de Maria Soares (Profisional senior ba grau A iha espesialidade servisu sosial), Gil Rangel da Cruz (Profisional senior ba grau A iha espesialidade jestaun estratéjika ba agrikultura no peskas), Nelson Philomeno Rego de Jesus (Profisional senior ba grau A iha espesialidade investigador senior), Edgar Sequeira Martins (Profisional senior ba grau A iha espesialidade jestaun rekursu umanus), João de Corte Real Araújo (Profisional senior ba grau A iha espesialidade jestaun rekursu umanus), Belarmino Filomeno Neves (Profisional senior ba grau A iha espesialidade jestaun rekursu umanus), Áureo José António Sávio (Profisional senior ba grau A iha espesialidade tékniku espesializadu ba boa governasaun) no Fernando Carvalho da Cruz (Profisional senior ba grau A iha espesialidade jestaun estratéjika ba transporte no komunikasaun).
Painel juri sira mai husi instituisaun APORTIL, ADTL, KFP, MAE, UNTL, Fundasaun Klibur Domin ho KAK mak avalia ba dokumentu hodi passa ba prosesu vaga ba kareira profisionais seniores.
Prova eskrita hala’o iha fulan Fevereiru 2020. Tanba pandemia COVID-19 mak prosesu hala’o fali iha fulan Agostu 2020 too faze final.
