Prezidente no Komisárius Komisaun Funsaun Públika hamutuk ho Kargus Xefias Sekretariadu Komisaun Funsaun Públika halao Workshop Internal iha Salaun Madre Karmelitas iha Postu Administrativu Maubisse Munisípiu Ainaro durante loron tolu konsekutivu (22-24/01/2024) hodi halo diskusaun no formulasaun ba programa prioriedade no planu estratéjiku ba IV Mandatu KFP, bazeia mós ba Planu Estratéjiku Dezenvolvimentu Nasionál (PEDN) 2011-2030.
Objetivu husi Workshop Internal Funsaun Públika atu halo Revizaun Planu Asaun Annual no Orsamentu Tinan 2024 aliñadu ho Programa prioritáriu IV Mandatu CFP nian, aprezentasaun ba dezafiu no obstákulu identifikadu durante Mandatu anterior no posível solusaun ba CFP IV Mandatu hodi defne Road Map ba asaun prioritáriu sir aba tinan 2024, halo diskusaun no apresiasaun ba asaun prioritáriu sira maka sei foku prioriedade implementasaun 2024, ajusta planu estratéjiku CFP, avaliasaun mudansa estrutura iha Rejimentu Internu hodi hatan ba dezafius identifikadus, oinsá foti asaun konkretu no reajusta Estrutura Sekretariadu.
Tuir Prezidente, Workshop Internu ne’e nia rezultadu maka identifika obstákulu sira ne’ebé maka Instituisaun Estadu ka Konsellu Ministru IX Governu husu ba KFP atu hadia.
Nu’udar líder ba iha IV Mandatu nia iha espetativa ida, atu hadia no halo loos, tanba Timor-Leste mós atu adere ba membru ASEAN nia ne’ebé maka adapta ba sistema dijitalizasaun, ho nune’e nia husu ba Diretores, Asesores Legais, atu konsidera no fó importânsia ba Worshop Internu ne’e ho boa vontade hodi tau hanoin no idaia hodi hetan rezultadu di’ak.
Husi rezultadu diskusaun ne’e mak Komisaun realiza workshop ne’e bazeia ba orientasaun husi Primeiru Ministru, Kayrala Xanana Gusmão hodi diskute ba asuntu importante sira liga ho mekanizmu rekrutamentu ida ne’ebé durante ne’e la’o, kareira íbrida, lateral entry, lei reforma ka dekretu lei reforma obrigatória ba funsionáriu ho idade avansadu ho dignu, diagnóstiku urjente ne’ebé hahú husi Ministériu hot-hotu to’o iha munisípiu, kontrolu kualidade no seluk tan hodi fó benefísiu ba funsionárius no joven sira ein jeral, ne’ebé sei enkamiña ebosu diskutidu ne’e ba Konselllu Ministru IX Governu Konstitusional hodi apresia no aprova.
Prezidente KFP Agostinho Letêncio de Deus hato’o nia apresiasaun ne’e iha serimónia enserramentu ba Workshop Internal loron tolu iha salaun madre Carmelitas, Postu Administrativu Maubisse, munisípiu Ainaro.
Prezidente KFP hateten, reprezentante Administrador Postu iha enseramentu ne’e atu sai testamuña ba diskusaun prioritárias sira ne’ebé Komisaun hamutuk ho dirijente sira diskute hodi sai hanesan esbosu ida ba Funsaun Públika ein jeral iha futuru mai hodi halo mudansa ba saida mak seidauk la’o no kontinua mellora ba sistema sira ne’ebé estabelese.
Partisipa iha Workshop Internal durante loron tolu iha Postu Maubisse ne’ebé lidera husi Prezidente no Komisárius sira, kargus diresaun sira apoia husi asesor sira, senior profisional no PROSIVU, hamutuk nain 44 kompostu husi feto 15 mane 29, ne’ebé ativamente ho boa vontade hodi kontribui ideias no opinioens to’o diskusaun remata.
Adelino Mendonça Espírito Santo, Servisu Lokal de Administrasaun Postu Maubisse, reprezenta Administrador Postu iha enserramentu Workshop ne’e, rekomenda ba KFP atu muda mekanizmu teste promosaun grau iha futuru tanba, funsionáriu balun ho antiguidade servisu no balun idade avansadu, balun la iha koñesimentu ba komputador ne’ebé barak la passa iha teste promosaun.
Reprezentante Administrador ne’e nu’udar funsionáriu ida ne’ebé sente preokupadu tebes nunka pasa iha teste promosaun durante ne’e tanba ne’e, nia sente hodi reprezenta mós maluk funsionáriu sira seluk, nune’e aproveita okaziaun ida ne’e.
Entretantu, iha loron dahuluk nian aprezentasaun Planu Operasional ba implementasaun atividade 2024 husi Diresaun sira, loron daruak nian iha sesaun ne’e Sekretária Ezekutiva aprezenta dezafius no possiveis solusoens iha Funsaun Públika, diskusaun brainstorming no define prioritárias sira Komisaun nian ba tinan lima nian husi kada grupu ne’ebé diskute iha área sira hanesan forsa traballu, kareira, E-recruitment, reforma no kontrolu kualidade no aprezenta hikas esbosu diskusaun planu ne’e mai husi asesor sira no loron tuir mai Diretor Nasionál Planeamentu Kuadru Pessoal iha Funsaun Públika aprezenta mós kona-ba konseitu forsa traballu no aprezenta esbosu formulasaun diskusaun prioritária sira.
