Komisaun Funsaun Públika liu husi Unidade Peskiza no Observasaun Funsaun Públika realiza worshop loron ida ho tópiku “Planeamentu Internu KFP 2022 hodi aprofunda interpretasaun rejimentu internu KFP atual no prioridade polítika KFP ba mandatu datoluk nian ba periodu tinan 2020 -2025, iha salaun Palácio das Cinzas Ministériu Saúde Caicoli Dili.
Sekretaria Ezekutiva, Maria da Costa Oliveira hateten, worshop aprofunda intrepretasaun rejimentu internu atual baze ba deliberasaun nú. 237/2021 Outubru no relasiona ho prioridade polítika KFP mandatu datoluk nian ba periodu tinan 2020-2025. Ho objetivu atu asegura kargu diresaun xefia sira hotu atu integra no kompriende di’ak ninia funsaun, kompetensia ne’ebé hatur ona iha rejimentu internu atu bele implementa aktividade ne’ebé define iha planu asaun anual aliñadu ho prioridade ne’ebé terseiru mandatu define ona liga ba iha planu estratéjiku KFP nian no Planu Estratejiku Dezenvolvimentu Nasional (PEDN) Governu nian ba tinan 2011-2030 tuir objetivu dezenvolvimentu nasional ho sustentavel.
Prezidente KFP, Faustino Cardoso Gomes iha diskursu abertura, konsidera eventu worshop ne’e estratejiku no fundamental ba iha susesu realizasaun knar no responsabilidade diresaun hotu nian, atu hamutuk hodi kontribui ba alkansamentu objetivu iha âmbitu prioridades planu asaun anual no oinsá nia aliñamentu sira no planu Governu nian atu ajuda hasa’e efikasia, efisiensia atendimentu no prestasaun servisu tuir área kompetensia Komisaun Funsaun Públika nian.
Tuir Prezidente katak, worshop ne’e parte ida husi seriedade aktividade ba asaun ne’ebé Komisaun halo atu asegura implementasaun ba prioridades terseiru mandatu KFP nian ne’ebé ba dala uluk halo revizaun ba regimentu internu no define orsamentu apropriadu tuir planu alterasaun ba rejimentu internu, tuir formatu estrutura organika ne’ebé komisaun define no harií.
Hafoin aprezentasaun husi kada diresaun no xefia ba ida-idak ninia kompeténsia servisu diresaun no departamentu ninian liga ho rejimentu internu, prioridade KFP no estratéjia hodi implementa, komísariu sira mós halo intervensaun ba kada kompeténsia servisu diresaun nian liga ho prioridade Komisaun nian.
Iha intervensaun Komisáriu, António Freitas kona-ba kompeténsia servisu sira liga ho diresaun ida-idak ho prioridade KFP nian no toka mós kona-ba kondisaun funsionáriu kontratadu iha KFP no husu ba diresaun sira hotu atu fó atensaun ba avaliasaun dezenpeñu, tanba Komisaun esforsu atu buka solusaun ba funsionáriu permanente maibé, tenki liu husi konkursu públiku.
Iha enseramentu worshop, Komisária Maria de Jesus Sarmento konsidera katak, haree husi aprezentasaun materia kada diresaun no xefe departamentu sira hatudu katak, maioria kompriende maibé, ligasaun ho prioridades hamutuk 44 ne’ebé identifika relasiona ho estratejia liga ho aktividade servisu lor-loron nian, ho baze ba vizaun misaun atu kumpri no asegura prioridade sira ne’ebé iha atu mellora di’ak liu tan.
Kona-ba rejimentu internu ne’ebé públika ona iha jornal repúblika ba kriasaun departamentu bens-moveis nian presiza halo ajustamentu, ba ajentes administrasaun públika nain 53 iha KFP komisaun sei buka dalan ba ida ne’e.
Ba rekomendasaun arkivo ne’ebé aprezenta ona ba komisaun sei haree hamutuk ho arkivu nasional kona-ba regras oinsá halo destruisaun ba dokumentus sira ne’ebé liu ona tempu no ba pontualidade, asiduidade servisu funsionáriu sira nian atu asegura servisu hotu la’o tuir tempu ho kualidade maske ida-idak ho nia difikuldades maibé pontualidade tenki sai nafatin prioridade. Asuntu seluk ba responsabilidade lisensa diária no anual tenki respeita hierakia ne’ebé iha inklui avaliasaun dezenpeñu tenki lao tuir lei no prosedimentu. Atu garante envolvimentu pesoál rekursu umanus SKFP ba iha GPRU husu atu halo diskusaun ho nivel diresaun atu garante kumprimentu regras no liga ho dekrisaun servisu no taferas sira funsionáriu sira kompriende sira nia knár atu asegura servisu lor-loron nian.
