| Tersa-feira, 07 Jullu 2026 – Prezidente Komisaun Funsaun Públika (KFP), Agostinho Letêncio de Deus no Komisárius hala’o sorumutu ho Ministru Prezidénsia Konsellu Ministrus no Portavós Governu, Agio Pereira relata servisu progresu reforma Administrasaun Públika no analiza dezenvolvimentu proposta ba kriasaun Rejime Karreira Únika Administrasaun Públika nian. Iha sorumutu ne’e, Komisaun aprezenta servisu sira ne’ebé halo ona iha kuadru prioridades ne’ebé define husi Despaxu n. 02/GPM/I/2025 no husi Rezolusaun Governu n. 58/2025, loron 15 fulan-outubru, ne’ebé orienta reforma jestaun rekursus umanus Administrasaun Públika nian. Aprezenta mós pontu situasaun ba preparasaun Polítika Rejime Karreira Únika iha Administrasaun Públika Timor-Leste. Dokumentu ne’ebé iha hela elaborasaun ne’e prevee, entre aspetu sira seluk, definisaun estrutura karreira, halo ajustamentu ba númeru forsa traballu Administrasaun Públika, proposta reajustamentu remuneratóriu, interligasaun Sistema Integradu Jestaun Administrasaun Públika (SIGAP) ho sistema prosesamentu salariál, no mós programa ida kona-ba formasaun ne’ebé ninia finalidade ba dezenvolvimentu kompeténsia téknika, funsionais no lideransa. Komisaun ne’e informa mós katak daudaun ne’e prepara hela semináriu nasionál ida kona-ba elaborasaun Rejime Karreira Únika, ne’ebé dirije ba membrus Governu, dirijentes Administrasaun Públika no lideransa munisipál sira. Objetivu mak atu aprezenta proposta polítika, rekolle kontributu hosi partisipante sira no konsolida vizaun komún ba implementasaun reforma ne’e. Entre tema sira ne’ebé prevee ona maka reforma Administrasaun Públika ne’ebé realiza hosi Governu Konstitusionál IX, modernizasaun ba jestaun rekursus umanus, hadi’a kualidade servisu públiku, no mós reforsu ba prinsípiu méritu, profisionalizmu no imparsialidade. Iha área kapasitasaun rekursus umanus, aprezenta mós pontu situasaun kona-ba programa formasaun karater ne’ebé prevee iha Rezolusaun Governu n. 58/2025. Faze dahuluk hosi inisiativa ne’e realiza ona ho grupu-pilotu ida ho elementu Guarda Prizionál no ofisiál Ministériu Justisa nian sira hamutuk na’in-100, no faze daruak iha hela preparasaun. Sorumutu ne’e permite mós atu analiza projetu konstrusaun Sentru Formasaun ida ba Funsionáriu Públiku sira, iha Atabae, munisípiu Bobonaru, no halo mós avaliasaun ba progresu implementasaun Rejime Reforma Obrigatória. Ministru Prezidénsia Konsellu Ministrus subliña importánsia hodi garante katak medida sira ne’ebé dezenvolve daudaun iha ámbitu reforma Administrasaun Públika no modernizasaun jestaun rekursus umanus Estadu nian bele kontribui ba Administrasaun Públika ida ne’ebé efisiente, profisionál no orientada liu ba prestasaun servisu ho kualidade ba sidadaun sira. |
