Segunda-feira, 25 Fevereiru 2019 – Prezidente Komisaun Funsaun Publika, Faustino Cardoso Gomes akompanha husi Sekretaria Ezekutiva, Maria de Jesus Sarmento hala’o enkontru ho SECOMS, Mericio Juvinal Akara, Diretora DNMGPE patrimonio Estadu Timotea P. Marques, Prezidente Konsellu Administrasaun RTTL,EP Fransico Gari, iha salaun enkontru SECOMS, Palasiu Governu.
Iha abertura enkontru ne’e Prezidente KFP esplika, enkontru ne’e atu finaliza prosesu destakamentu funsionariu husi RTTL,EP ne’ebé koloka fali ba SECOMS no Instituisaun estadu sira seluk, atu asegura dignidade pesoal funsionariu, no mós responsabilidade ba patrimoniu estadu hanesan motorizada ne’ebé seidauk entrega, atu asegura nia kontinuidade funsionamentu instituisaun estadu inklui RTTL,EP.
Objetivu husi enkontru ne’e atu koa’lia no hanoin lisuk, oinsa prosesu responsabilidade ba patrimoniu estadu hanesan motorizada atu entrega ho responsabilidade, ho kondisaun diak atu asegura dignidade funsionariu sira nian.
Enkontru ne’e hala’o durante oras ida resin, ho desisaun equipa konjunta ne’e sei kompostu husi KFP, SECOM, Patrimoniu Estadu, RTTL,EP ho servisu prioridade hodi halo verifikasaun ba patrimoniu estadu tomak iha RTTL,EP inklui motorizada ne’ebé funsionariu sira sidauk entrega.