Primeiru enkontru Komisaun Funsaun Públika ho Xefe Estadu Maior Jeneral, Falur Rate Laek hodi ko’alia kona-ba estabelesimentu servisu hamutuk ba dezenvolvimentu ba karákter, disiplina, nasionalizmu no patriotizmu funsionáius públikus foun ne’ebé sei rekruta iha futuru mai.
Tuir Xefe Estadu Maior Jeneral Falur Rate Laek ninia observasaun katak, daudaun ne’e ita tama hela iha situasaun ne’ebé kuaze lakon morál, respeita, lealdade no integridade.
Iha enkontru ne’e husi parte rua iha hanoin konkodansia ida atu tur hamutuk oinsá atu define no dezenvolve formasaun karákter ida ba funsionárius rekrutadus foun sira iha futuru mai atu hahú ho formasaun ne’ebé mak oinsá atu hatúr hikas karákter, disiplina bazeia ba iha identidade nasionál no kultura Timor ninian.
Enkontru ne’e hala’o iha edifisiu Ministériu Defeza, Fatuhada iha sesta-feira, (26/07/2024) ne’ebé hetan akompañamentu husi Sekretária Ezekutiva no xefe gabinete.
