Sexta Feira loron 11 fulan agustu tinan 2023, Komisaria Komisaun Funsaun Publika Maria de Jesus Sarmanto partisipa iha Steering Committee Grupu Jestores Profesionais Rekursus Humanus-GJPRU, hamutuk ho Ministeriu Saude hanesan Uma na’in, ho tema “Haburas fo fortifika servisu Administrasaun Publika iha area saude liu husi papel GJPRU”.
GJPRU ne’e rasik hanesan grupu ida ne’ebe mak hamahan-an iha Komisaun Funsaun publika nia okos, sai hanesan liman ain ba Komisaun Funsaun Publika hasoru malu fulan- fulan hodi hare ba kondisaun no situasaun sira ne’ebe mak funsionariu publiku sira hasoru.
Objetivu husi enkontru GJPRU nian ne’e, atu atualiza estrumentu legal sira, hare konaba lei no dekretu lei sira ne’ebe mak Komisaun Funsaun Publika no parte estadu nian produs, atu hodi halo diseminasaun kona ba informasaun no prosedimentu sira ne’ebe mak vigora tiha ona.
Iha Enkontru GJPRU nian ne’e, Komisaria Maria de Jesus Sarmento hateten, esistensia GJPRU halo ema barak dezenvolve sira nia kareira diak tebes, tamba sira iha komite ne’e halo enkontru lubun ida hodi halo diskusaun, buka oinsa atu solusiona ka resolve problemas sira ne’ebe mak sira hasoru, intermus de gestaun de Rekursus Humanus.
Nune’e mos Vise Ministru Operasionalizasaun Hospitais, dr. Flavio Bradão Mendes de Araujo hateten, inisiu Nono Governu Konstitusional nian, hahu kedas ho asuntus ida mais importante kona ba Rekursus Humanus, ne’ebe kaer papel importante no jere ema ho koinesementu luan, halo gestaun ba rekursus humanus, hodi hatudu atendimentu diak iha administrasaun funsaun publika nian.
Vice Ministru ne’e sente kontente, tamba inisiu nono Governu Konstitusional nian fo kedas oprtunidade ba Ministeriu Saude hodi halo diskusaun, atu bele solusi ona problema ne’ebe maka Ministeru rasik enfrenta, ho esperansa katak diskusaun sira ne’e bele resulta eskada ka dalan diak ba Ministeriu Saude. Enkontru GJPRU nian ne’e halao iha salaun Ministeriu Saude, Palacio das Cinzas Caicoli–Dili, ho partisipasaun masimu husi, Diretur jeral, Diretur Nasional, Vice Ministru nain rua, reprezentante funsionariu ministeriu nian husi munisipiu no Nasional, inklui autoridade Munisipiu Dili no Munisipiu sira.