KFP, 6 Agostu 2018, Sekretariadu Komisaun Funsaun Publika hala’o isar bandeira ne’ebé organiza husi Gabinete Prezidente no Unidade Protokolu no Komunikasaun Sosial. Inspetór ba isar bandeira maka Komisariu Asuntu Disiplinar, António Freitas.
Komisáriu disiplinár iha ninia diskursu apela ba funsionarius Sekretariadu Komisaun Funsaun Publika atu mantein pontualidade. Reforsa mós katak KFP hasai ona orientasaun kona-ba taka portaun atu nune’e kontrola funsionariu sira labele tama tarde, no fo tempu toleransia to’o 8:15 ba funsionariu sira, tantu diretor to’o kargu xefia sira.
KFP hanesan roll model katak, ita fo prosesu disiplinar ba instituisaun seluk, ita mos kontinua sai ezemplar atu hatudu nafatin ita nia komportamentu, integridade disiplinar institusional, dehan Komisariu Asuntu Disiplinar.
Tuir Komisariu António Freitas hateten, atu prepara ba promosaun, situasaun rua (pontualidade no komportamentu) ne’e tenki akompaña malu “karik hetan pena disiplinar administrativa, imi la hetan promosaun durante tinan tolu tanba ne’e ami mós lakohi funsionariu SKFP labele sai hanesan primeiru instituisaun ne’ebé maka infrenta situasaun ida ne’e”. Iha biban hanesan informa mós katak, iha VIII governu, KFP nudar instituisaun ida ne’ebé sei nafatin tutela ba Gabinete PM.
Serimonia isar bandeira ne’e hala’o iha resintu KFP, Obrigadu Barack.
