29-30 Agostu 2022, Komisáriu Komisaun Funsaun Públika, Fausto Freitas da Silva partisipa misa agradesimentu Loron Konsulta Popular ba dala 23 iha katedral Dili.
Hafoin misa kontinua ba kari aifunan iha tasi ibun Palásiu Governu nian hodi hanesan simbolu omenajen ida ba martires no erois sira.
Iha komemorasaun 30 Agostu 2022 ne’e hahú ho marsa ba Paz husi Estátua Proklamador RDTL, Francisco Xavier do Amaral to’o jardin 5 de Maio Colmera Díli.
Iha komemorasaun ne’e Prezidente Repúblika, José Ramos Horta agradese ba Ministru Estatal ne’ebé organiza atividade lubun ida iha teritóriu nasional, ho kolaborasaun no apoiu husi parte hotu tantu, setór privadu, setór públiku, sosiedade sivil no komunidade sira ba komemora Loron Konsulta Popular ba dala 23, ho onra boot no haksolok tebes.
Iha 30 Agostu 1999 ne’e hanesan memória ida ne’ebé hamosu ita nia independensia hodi fó sai ita nia vontade deklara an hanesan nasaun ida livre iha nasaun sira seluk nia leet. Konsulta Popular iha Timor-Leste ita hotu hatene, hafoin halo negosiasaun entre Governu Portugues no governu Indonézia no Sekretariu Jeral ONU Kofi Anan hodi hetan akordu sira iha loron 5 de Maio 1999 iha Nova Ioke, Timor oan hotu ho otas 17 ba leten tuir faze ba prosesu hotu hanesan, prosesu sívika no polítiku molok to’o referendum. Timor oan sira ho dignu tebes hodi hatudu sira nia sibilidade no ordem sira kumpri prosesu tomak liu husi dalan oi-oin, la tauk, ho emosaun tanba hakarak determina ba ukun rasik an, tanba terus no presaun ne’ebé sira hetan durante tinan barak nia laran. Maibé ohin loron ita ksolok no fó onra ba eroi sira no povu Timor ne’ebé determina loron konsulta popular sai loron ne’ebé ita hahú kore an husi ukun Indonézia nian, hateten Prezidente RDTL José Ramos Horta iha komemorasaun Konsulta Popular ba dala 23 ho tema “Ho Espíritu Konsulta Popular 30 de Agostu 1999, Mai Ita Hametin Paz No Estabilidade Ba Dezenvolvimentu Iha Ita Nia Rai Timor-Leste”.
Partisipa iha loron Konsulta Popular ne’e Komisáriu Fausto Freitas da Silva hamutuk ho Jeneral F-FDTL, Falur Rate Laek, Komisariu PNTL, Ministru no Vise Ministru Administrasaun Estatal, Ministru Trasporte no Komunikasaun, ho membru governu, membru Parlamentu, Autoridade Lokal, komunidade no estudante sira.
Komerasaun loron 30 Agostu 2022 realiza iha Jardim 5 de Maio, Colmera, Díli no taka ho atividade dada rifa ba manán nain sira ne’ebé mak hetan prémiu no ba jogu amizade ne’ebé realiza iha kada suku.
