Komisaria Maria de Jesus Sarmento representa Presidente Komisaun Funsaun Públika halo abertura ba aktividade Kompetisaun Koral hodi komemora Loron Nasional Funsaun Públika ba dasiak ho Tema Ami hala’o ona kna’ar nu’udar servidor públiku, rona mós ami-nia lian.
Durante Diskursu Komisaria Maria de Jesus Sarmento hateten, iha tinan sira uluk, selebrasaun Loron Nasional Funsaun Públika, Komisaun de’it maka halo, maibé hahú Segundu Mandatu, Komisaun Funsaun Públika konsidera loron 15 de Julho nu’udar Loron Nasional ba funsionáriu públiku hot-hotu, atu sira bele senti no valoriza loron ne’e, hodi komemora ho aktividade divertimentu sira, hodi kontinua hametin amizade no fahe esperensia ba malu.
Komisaria Maria hateten, maske funsionariu sira hala’o ida-idak nia kna’ar iha instituisaun ketak-ketak maibé senti katak funsaun públika ida de’it nu’udar servidor estadu, tanba ne’e aktividade kompetisaun koral tinan 2023 nu’udar talentu ida-diak nian, maibé funsionáriu nu’udar individua ou kolektivu bele demontra no hatudu nafatin talentu iha kompetisaun ne’e.
Iha fatin hanesan Presidente Komisaun Organizadora Paulino Quintas hateten, grupo koral ne’ebé regista hamutuk 20 mai husi linhas ministerias sira, maibé grupo koral 19 de’it maka partisipa, ne’e parte ida husi aktividade 13 ne’ebé Ministériu Assuntu Parlamentar Komunikasaun Sosial (MAPKOMS) planeia hodi komemora Loron Nasional Funsaun Públika ba dala 9 iha tinan 2023 ne’e.
Paulino Quintas hateten, aktividade kompetisaun koral ne’ebé organiza husi MAPKOMS servisu hamutuk ho Ministériu Justiça durante loron rua ne’e, atu kontinua hametin no promove identidade kultura Timor nian, hodi kanta músika obrogatóriu Marca Funsaun Públika no músika eskoilidu rua ka liu, realiza iha salaun enkontru Ministériu Justiça Caicoli Díli.
Kompitisaun koral ne’e hetan partisipasaun husi Diretor Jeral husi linhas Ministeriais no representante husi PNTL ho nian rezultadu mak hanesan Ministériu Investimento Estratejiku sai premeiru lugar ho valor 2.620, segundu lugar ekipa koral husi Presidensia da Repúblika ho valor 2.605, terseiru lugar ekipa koral husi Parlamentu Nasional ho valor 2.576, kuartu lugar ekipa koral husi Ministériu Públiku ho valor 2.567, kintu lugar ekipa husi Ministériu Edukasaun ho valor 2.557, no sextu lugar ekipa koral husi Inspektor Jeral Estadu ho valor 2,516.
Manan na’in sira sei simu premeiu iha loron aniversariu Funsaun Públika loron 15 fulan Jullu tinan 2023, maibé seidauk mensiona premeiu saida mak sei fó ba manan na’in sira, maibé Komisaun Organizadora sei konvida ekipa koral ne’ebé sai premeiru lugar atu anima eventu komemorasaun aniversáriu Loron Nasionál Funsaun Públika iha loron 15 jullu tinan 2023 ho músika obrigatoriu Marcha Funsaun Públika no músika eskoilidu “ Timor ida de’it “, ekipa juri kompetisaun koral mai husi parte relijiozu no relijioza sira.
Entetantu quinta feira 6/7/2023, Presidente Komisaun Funsaun Públika Faustino Cardoso Gomes, Komisaria Maria de Jesus Sarmento no Komisariu Fausto Freitas da Silva – Liurai Taci kontinua halo enkontru ho Presidente Komisaun Organizadora Paulino Quintas ho nia ekipa hodi halo deskusaun ba aktividade ne’ebé hala’o ona no sei kontinua halo iha ambitu komemorasaun Loron Nasional Funsaun Públika ba dala sia tinan ida ne’e.
Presidente KFP Faustino Cardoso Gomes hateten agenda enkontru ne’e atu komisariu sira bele hatene progresu aktividade sira iha ambitu Loron Nasional Funsaun Públika ne’ebé hala’o ona, no iha planu sei atu kontinua hala’o atividade sira seluk iha tempu oin mai.
Enkuantu Presidente Komisaun Orgnizadora Paulino Quintas esplika aktividade sira iha ambitu Loron Nasional Funsaun Públika ne’ebé remata ona maka kompetisaun koral, Seminariu iha parte Leste ne’ebé konsentra iha Munisipiu Baucau no aktividade seminariu sei kontinua hala’o tempu badak iha parte Centru sei konsentra iha postu administrativu Maubisse Munisipiu Ainaro no parte Oeste sei konsentra iha Munisipiu Bobonaro inklui aktividade desportu modalidade Foot Sal no Basket Feto ho Mane ne’ebé lao dadaun hela. Aktividade ne’ebé kontinua iha planu atu hala’o maka vizita Guarda prizional Suai-Covalima, Gleno-Ermera no Becora Díli, aktividade lao tuir Ain fatin saudozo Nicolau dos Reis Lobato, Marcha saudavel, ne’ebé Instituisaun indikadu maka sei respobiliza. Alem de ne’e Presidente KFP no Komisariu/a hamutuk Presidente Komisaun Organizadora deskuti kle’an liu konaba eventu komemorasaun Loron Nasional Funsaun Públika ba dala-9, 15 Jullu tinan 2023 ne’ebé sei monu iha loron sábadu no tuir planu sei lansa mós kartaun identidade ba funsionáriu sira nian ne’ebé prepara husi Komisaun Funsaun Públika.
