Díli 14 fevereiru 2023, Komisaun Funsaun Públika realiza lansamentu fatuk dahuluk ba konstrusaun edifisiu Komisaun Funsaun Públika E-recruitment ne’ebé mak sei konstrui durante fulan 8 ho totál orsamentu USD 1.548,290.67.
Lansamentu ne’e hahú ho asinatura kontratu ho kompania kontrator Community Housing Limited Timor (CHLT) no kompania konsultor ARCHTimor Engineering Consultant (AEC) in Association ADERROMA Engineering Consultant (ARECO) Ba Supervizaun Konstrusaun Edifisiu E-Recruitment.
Ba kompania supervizor nian KFP hamutuk entidade Governu kompostu husi (ADN, CNA, SGP, Obras Públikas) realiza ona asinatura iha loron 7 fevereiru 2023 iha KFP, no ohin kontinua asina notice to proced hodi nune’e bele sai hanesan baze ida hodi hahú servisu ba konstrusaun edifisiu refere.
Ba kompania kontrator Community Housing Limited Timor (CHLT) asina kontratu ho totál orsamentu USD 1.548,290.67 no ba kompania supervizor asina kontratu ho totál orsamentu USD 178,604.00. Objetivu KFP kontrata mós supervizor hodi apoia dono do projeto “owner” atu asegura, superviziona no akompaña lalaok kualidade konstrusaun edifisiu nian hodi bele uza ba teste eletróniku ba rekrutamentu, promosaun no seleksaun nian. No dezeñu ba BOQ edifisiu ne’e mai husi kompania The Oliveira ho andar tolu.
Iha abertura ne’e Prezidente KFP hahú ho saudasaun domin, tanba loron domin, “14 fevereiru”, sentidu ida figuradu ne’ebé ita hotu tenke hatudu domin, kontraktor, konsultor tenke servisu ho domin inklui ita hotu nebe sai testamunha hotu-hotu tenke ho domin, atu nune’e rezultadu sai duni ita nia domin, iha edifisiu ida que diak ho kualidade, hametin liu tan dignidade institusional Estadu iha âmbitu servisu funsaun públika ninian, dehan Prezidente KFP, Faustino Cardoso Gomes iha lansamentu fatuk dahuluk ba edifisiu E-recruitment CFP.
Nune’e Prezidente KFP hateten, casa da Função Pública, uma atu hodi serbí ba povu, modelu modernu minimalis, edifisiu ne’e atu haree kona-ba rekrutamentu la’ós kona-ba ne’e de’it ne’’ebé hatudu vizaun misaun Estadu nian ba iha Funsaun Públika. Ezatamente prezensa edifisiu ida ne’e halore no hatudu mai ita, vizaun ne’ebé mak ita la’o mak E-recruitment ho funsaun públika ida ne’ebé tenke asegura profisionalizmu, kualidade servisu, lalais no Funsaun Públika ida ne’ebé tenke ajustadu ho situasaun teknolojia informátika, ezatamente edifisiu ne’e reprezenta sentidu sira ne’e.
Iha tempu hanesan Diretor Ezekutivu ADN fó hanoin ba kompania no konsultan atu projetu ne’e implementa no termina tuir tempu, tanba tuir esperensia ADN nian dala barak haree projetu barak mak aplika tuir tempu ne’ebé, tanba ne’e atu realiza ida ne’e la iha dalan seluk, tenke hadia jestaun de servisu “Project Management”. No sujere ba projetu nain atu buka realiza enkontru semanal no relatóriu semanal ho kompania konstruktor no konsultan sira, kontinua realiza tuir works schedule ne’ebé iha.
Wainhira ita temi liafuan E-Recruitment ne’e ha’u nia background rasik no agora nu’udar Ministru ba Obras Públikas, antes hanesan deputadu iha asuntu infraestrutura nian ha’u kompriende ezijensia tomak inklui edifisiu ne’e rasik, ne’ebé hetan kontribuisaun barak husi ema hotu no agradese hot-hotu nia partisipasaun no kolaborasaun husi parte ADN ne’ebé halo verifikasaun inklui mós CNA organiza prosesu tender ho tempu ne’ebé limitadu.
Ministru Obras Publikas kompromete orienta tékniku obras publikas nain 2 hodi inklui iha PMU hodi asegura kualidade edifisiu atu konklui tuir tempu ne’ebé atempada no edifisiu E-recruitment ne’e atu fasilita no tuir ezijensia servisu no kontribuisaun diak liu tan hodi servi ita nia povu liu husi servisu funsaun públika.
Iha lansamentu fatuk dahuluk ba edifisiu E-recruitment ne’e hahú ho ritual kultural no bensaun husi Padre Aderito Siqueira tuir kedas ho tau fatuk dahuluk nian husi Prezidente no entidade sira hanesan simbolu ida hodi hahú ba konstrsaun edifisiu refere.
Partisipa iha atividade lansamentu ne’e mai husi reprezentante vise Primeiru-Ministru, Ministru Obras Públika, Provedor PDHJ, Komisáriu KAK, Inspetor Jeral Estadu, Komisáriu KFP asuntu disiplinar, komisária KFP portfóliu Finansas, Baze Dadus iha Funsaun Públika, Pensaun no Reforma, Protokolu no Komunikasaun, Sekretária Ezekutiva SKFP, Inspetora KFP no Kargus Diresaun no Xefias sira iha SKFP, ADN, CNA no tékniku husi Obras Publikas.
