Dili, 15 Setembru 2026 — Lideransa Ekipa Kuartilateral, kompostu husi Komisariu Komisaun Funsaun Públika (KFP), Provedor Direitus Humanos no Justisa (PDHJ), Komisariu Comisaun Anti-Corupsaun (CAC) no Inspetór Gerál Estadu (IGE), husu atu Servedor Estadu fo prestasaun servisu administrasaun públika iha Timor-Leste tenki asesível, responsivu, transparante, justu no efetivu, hodi asegura atendimentu diak ba sidadaun sira hotu.
Mensajen ne’e sai iha sesaun interativu iha Programa RTTL Ita Nia Bainaka, tersa-feira (15/09/2026), nu’udar parte husi atividade ba preparasaun no selebrasaun Loron Nasional Funsaun Públika 2026 nian, ne’ebé sei hala’o iha Gleno, Munisípiu Ermera, ho tema “Servisu Públiku Asesível, Responsivu, Transparante, Justu no Efetivu.”
Provedór Direitus Humanos no Justisa, Virgílio da Silva Guterres “Lamukan”, esplika katak Timor-Leste hanesan Estadu Direitu Demokrátiku, tanba ne’e prinsipiu demokrasia tenki refleta mos iha maneira fo prestasaun servisu iha administrasaun públika nian ba sidadaun sira.
“Administrasaun públika tenki sai hanesan mekanismu importante ba funsionamentu Estadu atu kumpre nia obrigasaun no objetivu, liuliu hodi hadi’a moris povu nian,” hateten Provedór.
Nia subliña katak servisu administrasaun públika tenki asesível, responsivu, justu, seguru no efetivu, no garante katak sidadaun hotu hetan direitu hanesan ba atendimentu sira, laiha diskriminasaun bazeia ba suku, rasa, idade ka kondisaun sira seluk.
Iha parte seluk, Prezidente Komisaun Funsaun Públika, Agostinho Leténcio de Deus, hateten katak atendimentu públiku diak depende mos ba kualidade no integridade funsionáriu públiku sira.
Tuir nia, funsionáriu públiku tenki iha integridade, kualidade, efetividade no profesionalizmu, inklui koñesimentu kle’an kona-ba nia servisu, koñesimentu ba servisu báziku sira, atitude no étika pesoál, maibe atu hetan funsionáriu públiku ne’ebé iha kualidade, tenki hahú husi prosesu rekrutamentu ne’ebé diak, bazeia ba meritu, ho divizaun no Hirarkia servisu ne’ebé klaru.
Lideransa Ekipa Kuartilateral mos husu funsionáriu públiku hotu atu uza Loron Nasional Funsaun Públika 2026 nian la’ós de’it hanesan momentu ba selebrasaun, maibé nu’udar oportunidade atu halo reflesaun kona-ba sira-nia responsabilidade ba Estadu no povu.
Sira subliña katak funsionáriu públiku tenki kontinua aumenta responsabilidade no integridade iha servisu, ho respeitu ba regra no prinsipiu administrasaun públika nian sira, hodi kontribui ba dezenvolvimentu nasaun no hadi’a qualidade moris povu Timor-Leste. Selebrasaun Loron Nasional Funsaun Públika 2026 iha Gleno Ermera sei lori tema ne’ebé foka ba esforsu hamutuk atu hametin servisu públiku ne’ebé nakloke, integradu, responsivu no orientadu ba nesesidade sidadaun nian.