Sai funsionáriu públiku la’ós knár atu asegura moris pessoál no família maibé, partisipa ativamente iha konstrusaun Estadu no dezenvolvimentu nasaun no ba povu. Haree husi programa la’o tuir ain fatin Falintil sira nian hahú husi Aitahan Belar, Taibesi, Díli la’o to’o Aisirimou, Aileu nota katak, memória Falintil sira nian tempu rezisntesia hahú ho liafuan todan Patria Ou Morte. Nune’e ba funsionáriu públiku sira nu’udar servidor públiku di’ak, reforma do que dezenvolvimentu la to’o baze. Rekuñesimentu no apresiasaun kada tinan husi membru Governu iha kada Governasaun atu fó hanoin ba funsionáriu sira katak, dezafiu boot sira sei mai no sei presiza nafatin sakrifisiu barak liu tan husi funsionáriu públiku sira.
Prezidente Komisaun Funsaun Públika, Agostinho Letêncio de Deus ko’alia liafuan ne’e iha diskursu serimonia komemorasaun loron Funsaun Públika ba dala 10 ho Tema “Hametin Espíritu Nasionalizmu no Patriotizmu, Tane A’as Étika Profisionalizmu Hodi Serví Povu no Nasaun”, ne’ebé organiza husi MACLN hala’o iha kampu Administrasaun Postu Ainaro, iha segunda-feira, (15/07/2024).
Autoridade KFP, Agostinho Letêncio de Deus subliña, haree husi dezafiu sira ne’ebé iha, IV mandatu KFP halo esforsu atu responde ba kualidade funsionáriu públiku ba programa Reforma Administrasaun Públika baze ba orientasaun Primeiru Ministru Kayrala Xanana Gusmão, tanba ne’e KFP hamutuk ho ajensia PROSIVU halo ona diagnóstika no rezultadu lansa iha komemorasaun Loron Nasionál Funsaun Públika ba dala 10 iha Munisípiu Ainaro. Husi rezultadu diagnóstika hatudu to’o ohin loron, dezafiu ne’ebé mosu barak iha Administrasaun Públika maka númeru Funsionáriu Públiku aumenta ba bei-beik. Funsionáriu sira tendénsia husu atu asina kontratu termu-sertu ho grau ne’ebé ás, orsamentu ba saláriu vensimentu aumenta ba bei-beik maibé, atendimentu públiku sei menus nafatin, influénsia modernizasaun no globalizasaun ne’ebé domina digitalizasaun maibé, polítika dezenvolvimentu kompeténsia funsionáriu sira, seidauk konsentra atu responde ba dezafiu sira, seidauk halo formasaun baze ba kompeténsia kada funsaun, formasaun obrigatóriu ba dirijente no xefia sira, no mós bem-estar ba funsionáriu sira.
Agostinho Letêncio de Deus esplika, polítika IV mandatu KFP nian ba reforma maka sei propoin proposta ba Konsellu Ministru ba fiksasaun vagas iha prosesu promosaun pesoal 2024, no proposta foun kona-ba promosaun tuir antiguidade liu-liu ba funsionáriu sira servisu tinan barak, nunka hetan promosaun.
Autoridade Funsaun Públika ne’e mós dehan, sei hato’o proposta dekretu lei hodi regula planeamentu no jestaun forsa traballu Funsaun Públika, proposta kona-ba limite idade ba servisu ativu no implementasaun reforma ne’ebé submete ona ba Parlamentu Nasional. Reforma kareira Funsaun Públika atu harmoniza estrutura pagamentu entre kareira jeral no kareira espesial no fahe di’ak liu kareira estrutural no funsional, aumentu ezijénsia ba servisu públiku hodi ajusta númeru no abilidade (kuñesimentu téknika no espesializada husi funsionáriu públiku hodi hala’o funsaun ho professional kualidade, proposta kona-ba prosesu avaliasaun dezempeñu.
Tuir Agostinho Letêncio de Deus dehan, atu atinji ba mehi polítika IV mandatu nian, la’ós de’it responsabilidade KFP nian maibé, responsabilidade ba funsionáriu públiku sira hotu, liu-liu kargu diretor jeral no diretor nasionál rekursus umanu ne’ebé responsavel diretamente ba planeamentu pessoál, avaliasaun dezempeñu regular, rekrutamentu formasaun, progresaun no promosaun, asiduidade no instrumentu jestaun iha liñas ministerial. Importante seluk mós kontribuisaun Funsionáriu Públiku sira ba kresimentu ekonomia, nu’udar fatór krusial no vital ba dezenvolvomentu Timor-Leste ba preparasaun adesaun ba ASEAN.
Entretantu, Ministru Planeamentu Investimentu no Estratejiku, Gastão Sousa reprezenta Primeiru Ministru iha diskursu hateten, programa IX Governu Konstitusional kompostu área prinsipal neen hanesan, afirma fila fali Estadu direitu demokratiku, dezenvolvimentu kapital sosial, infraestutura, ekonomia, konsolidasaun governativa no boa governasaun, no mós kombate hasoru korupsaun. Husi programa neen ne’e Governu prioritiza rua ne’ebé liga diretamente ba setór Administrasaun Públiku hanesan konsolidasaun governativa no kombate korupsaun. Desentralizasaun ba Administrasaun Públika maka partisipasaun demokratika no dezenvolvimentu ekonómiku iha nivel munisipal to’o rural.
Prezidente afirma, boa governasaun no kombate korupsaun mós nu’udar prioridade ba IX Governu Konstitusional ba prestasaun servisu públiku ho kualidade hodi implementa polítika dezenvolvimentu ida ne’ebé hanesan ba ema hot-hotu iha Timor-Leste laran tomak. Transparansia responsabilidade no lideransa maka prinsipiu esensial ne’ebé Governu sei promove liu husi auditoria, meknizmu jestaun risku, no uza adekuadu ba funsonalizmu públiku ho prinsipiu OSAN POVO NIAN JERE HO DI’AK.
Gastão Sousa subliña, liga ba komprimisu lima ne’ebé Prezidente no Komisáriu KFP sira nia planu prioridade atu implementa durante mandatu maka programa digitalizasaun jestaun funsionalizmu públiku, hadia prosesu planeamentu no rekrutamentu, kapasitasaun ba funsionáriu públiku, kareira funsionáriu públiku, jestaun rekursu umanu hodi hadia prestasaun servisu ba povu. Fiar katak, kompromisu sira ne’e sei bazeia ba analiza ida ne’ebé klean tuir nesesidade ne’ebé eziste iha Timor-Leste. Kona-ba nesidade ba reforma tenki haree liu ba Estadu nia interese hodi kurizi, konsolida kondisaun ba dezenvolvimentu ekonomia ba nasaun no ba povu Timor-Leste.
Gastão Sousa husu atu fó importansia no posibilidade di’ak no kualifikadu iha munisípiu ida-idak atu harií, hadia no hametin instituisaun Estadu nian.
Tuir Ministru MPIE ne’ebé reprezenta Primeiru Minsitru katak, funsionáriu públiku ne’ebé di’ak no kualifikadu iha Munisípiu importante tanba, bazeia ba programa Governu nian ba desentralizasaun iha munisípiu hodi lori hakbesik Governasaun ba povu. Nune’e Estadu bele kontrola servisu atu povu bele senti benefisiu dezenvolvimentu ba moris di’ak hanesan ba ema hotu.
Gastão Sousa lori Primeiru Ministru nian naran husu ba instituisaun Estadu no ajensia dezenvolvimentu sira hotu atu fó apoiu ba malu hodi halo servisu, hodi fó susesu ba polítika reforma iha área administrasaun públika ida ne’ebé profisional ho karakteriístiku ida ne’ebé integradu, prestasaun servisu ne’ebé di’ak, implementa boa governasaun, serví Estadu ne’ebé di’ak, kaer metin integridade no hakruk ba lei ne’ebé regula funsionamentu administrasaun públika.
Reprezentante Primeiru Ministru ne’e haktuir, iha semana kotuk liu husi enkontru Konsellu Ministru halo apresiasaun ba planu reforma administrasaun públika ne’ebé Prezidente no Komisáriu sira aprezenta hein katak, reforma ne’e bele la’o tuir planu ne’ebé KFP determina no lori Governu nia hato’o parabéns ba funsionáriu públiku ne’ebé selebra LNFP ba dala 10.
Kulmine husi komemorasaun ne’e lansa mós rezultadu diagnóstiku iha funsaun públika, fahe premiu ba manan nain sira iha modalidade desportu, kompetisaun koral, alende ne’e fó mós premiu ba komunidade sira ne’ebé realiza mós dansa kultural, promove gatronomia Ainaro ne’ebé organiza husi Autoridade Munisípiu Ainaro.
Ikus husi atividade ne’e dada rifa no uma nain ba tinan 2025 nian sei organiza husi Ministériu Finansas ba LNFP – XI iha tinan 2025.
