15 Jullu 2021, Komisaun Funsaun Públika hamutuk ho komisaun organizador husi Ministériu Saúde organiza Komemorasaun Loron Funsaun Públika ba dahitu ho tema “ÁBITU SAUDÁVEL HO PROMOSAUN VASINA HASORU COVID-19 NU’UDAR DALAN BA “NOVA NORMALIDADE” IHA ATENDIMENTU PÚBLIKU” ne’ebé mak taka ho misa agradesimentu iha igreija Katedral Dili.
Hafoin misa agradesimentu tuir kedas ho serimonia kúlmine ba Loron Nasional Funsaun Públika ba dahitu, iha diskursu Prezidente Repúblika Demokrátika Timor-Leste, Francisco Guterres Lu-Olo hato’o ba funsionárius públikus no ajentes sira hotu ho objetivu jeral hodi promove nafatin knár Funsaun Públika ninian ba dezenvolvimentu funsionáriu sira nian hodi hala’o sira nia knár iha instituisaun estadu no hodi serbí ita nia povu ho étika no profisionalizmu.
tema ne’ebé Ministériu Saúde hili ba selebrasaun ida ne’e mak “ÁBITU SAUDÁVEL HO PROMOSAUN VASINA HASORU COVID-19 NU’UDAR DALAN BA “NOVA NORMALIDADE” IHA ATENDIMENTU PÚBLIKU”, tema ida ne’e lori ita atu ba nesesidades urjentes, hodi promove âbitu no komportamentu sira ne’ebé halo ita moris saudável.
Durante loron sanulu nia naran Ministériu Saúde hala’o atividade barak, hodi promove saúde no bem estar funsionárius no ajentes sira nian iha administrasaun públika, hodi bele dedika an diak liu tan, atu bele dezempeña sira nia funsaun ho kualidade, hodi sai hanesan ezemplu ba familia sira no ba populasaun ein jeral.
Tema ne’e bolu atensaun jeral husi ministeriu saúde ne’ebé hala’o daudaun kontra virus covid-19, nu’udar esforsu boot ida husi governu Timor-Leste, hodi prevene no kontrola moras covid-19, atu povu tomak bele fila fali ba moris normal ka bainbain, atu ita hotu bele ajuda lalais liu tan prosesu dezenvolvimentu sustentavél iha ita nia paíz.
Parabéns ba programa ne’ebé Ministériu Saúde hala’o, funsionárius no ajentes públikus iha Timor-Leste laran tomak, señoras no señores sira, hau aproveita okaziaun ida ne’e hodi bele hato’o hau nia agradesimentu ba funsionárius públikus no ajentes públiku sira hotu, ba esforsu tomak no empeñu husi ida-idak, ne’ebé servisu iha instituisaun sira, iha instituisaun estadu no instituisaun autónomu sira hotu.
Prezidente Repúblika no sidadaun hot-hotu sei la haluha imi nia kreatividade, dedikasaun no empeñu tomak, iha ita boot sira nia knár lor-loron nian. Prezidente Repúblika, liu-liu iha efikasia, kualidade liu husi instituisaun estadu no autónomu sira, no husi funsionárius no ajentes ida-idak husi ohin ba oin, hein mos ita boot sira, respeitu ba prinsipiu no legalidade, transparensia no imparsialidade, hanesan dalan hot-hotu nian atu serbí diak liu tan ita nia estadu no ita nia povu tomak.
Molok remata, hau hakarak dirije hela mensajen espesial sira ne’ebé sai dirijente iha administrasaun públika sira, atu hare oinsá kapasita, motiva, enkoraja, valoriza liu tan funsionárius no ajente públiku sira ne’ebé hala’o hela ninia knár ho eselensia. Importante tebes, katak, ajente no funsionárius públikus ida-idak involve an iha vida instituisaun nian, ho ideia no asaun, ho matenek ida-idak nian, iha prosesu hadiak servisu estadu nian atu serbí diak liu tan povu Timor-Leste.
Parabés ba dala hitu loron Funsaun Públika nian, antes atu hakotu, hau dirije pessoal ba ita boot sira hotu hanesan funsionáriu públiku katak, ita sei iha ema ne’ebé mak lahamutuk ho ita, sira hatene dedika sira nia an, fo sira nia vida tomak atu bele serbí ita nia rain ida ne’e. Hau fo lembra fila fali ba saudozu Nicolau Lobato ne’ebé mak iha tinan kotuk, hodi komemora ba iha nia fatin ne’ebé mate, hodi ba to’o iha Nino Conis Santana ho nia soldadu sira, ho mos ita nia populasaun sira, ema kiik sira ne’ebé mak fo an tomak ba liberta ita nia rai ida ne’e ba independensia.
Ohin loron ita ne’ebé mak traballador estadu ida ne’e nian, ita simplesmente simu deit eransa husi sira, simu eransa ida ne’ebé hatene dedika nia an atu bele serbí nafatin ho diak ba ita nia povu no paíz ida ne’e. Ida ne’e mak hau hakarak hato’o ba ita boot sira hotu no ita hotu atu bele halo reflesaun hamutuk ba iha loron ohin nian.
Iha tempu hanesan Prezidente KFP, Faustino Cardoso Gomes hateten, Lema prinsipal ne’ebé realiza ba komemorasaun ba tinan ne’e hanesan pontu partida ida ba realizasaun atividades sira ne’ebé mak hala’o hanesan atendimentu konsulta jeral ba komunidade iha nasional to’o munisipiu sira hotu ne’ebé hala’o husi médiku espesialista sira no profisionais saúde durante semana ida hahú iha loron 5 jullu to’o 10 jullu, atividade marcha saudável ne’ebé hahú husi MNEK oin to’o Largo Lecidere, tuir planu ne’ebé mak komisaun organiza realiza, ida ne’e atu destaka liu tan oinsá komunidade sira moris saudável liu tan, ao mesmo tempo oinsá atu enkoraza funsionárius públikus, ajentes administrasaun públika nomos sidadaun hotu atu toma inisiativa hodi partisipa iha prosesu vasinasaun hanesan meius ida aumenta imunidade iha âmbitu saúde públika, nune’e kumpri dever síviku no patriotizmu.
Iha komemorasaun ne’e Prezidente KFP lori komisaun nia naran hato’o mós parabéns no kongratula ba funsionáriu públiku, ajente administrasaun públika iha teritoriu laran tomak ba loron ida ne’e.
“Komemorasaun Loron Funsaun Públika ba dahitu ida ne’e lori KFP nia naran hato’o parabéns ba funsionárius sira husi nasional, sub nasional no postu administrativu sira, atu oinsá banati tuir rekomendasaun regras hasoru covid-19 ninian, atu oinsá hala’o servisu ho di’ak nafatin ho atendimentu públiku tuir ida-idak nia responsabilidade servisu. Maske ita hasoru kalamidade covid-19 ne’ebé hahú kedas iha tinan kotuk, ida ne’e hanesan dezafius ba ita, maibé oinsá atu enkoraja di’ak liu tan, servisu di’ak liu tan, nafatin hasoru ameasas husi inimigu invisivel,” esplika Prezidente KFP.
Eventu komemorasaun ne’e partisipa másimu husi Prezidente Repúblika Timor-Leste, Primeiru Ministru no membru governu sira hotu, diretores jerais, diretores nasionais, parseirus dezenvolvimentu no média sira hotu.
Iha kúlmine serimonia ne’e taka ho dada rifa husi reprezentantes liñas ministeriais hotu no sai hanesan uma nain ba komemorasaun Loron Nasional Funsaun Públika daualu ba tinan 2022 mak Ministériu Administrasaun Estatal (MAE).