MAE-KFP Fó Teste Ba Sekretáriu Munisípiu 7

Ministeriu Administrasaun Estatal (MAE) fasilita husi Komisaun Funsaun Públika loke konkusu internu ba vagas kargu Sekretariu Munisípal nian ba pozisaun 7 ne’ebé tuir teste méritu hodi passa iha pozisaun nu’udar Sekretariu munisipal nian iha munisípiu sira hanesan Aileu, Ainaro, Ataúru, Dili, Ermera, Lautem no Viqueque.

Teste ne’e hahú ho simulasaun ne’ebé fasilita husi ekipa tékniku diresaun nasionál Rekrutamentu no Dezenvolvimentu iha Funsaun Públika hodi inteira aplikasaun teste ne’e.

Prezidente Komisaun Funsaun Públika, Faustino Cardoso Gomes iha sesaun abertura ne’e enkoraja konkorentes sira ne’ebé iha vontade tomak tuir teste eskrita, tanba laiha  diskriminasaun iha teste ida ne’e, teste ne’e la’o ho impasialidade no transparensia. Teste ne’e kompetetivu tebes ba kandidatus sira wainhira responde hotu pergunta sira ne’e mak liu pontus 60 mak sei admitidu ba sesaun teste seluk tuir mai, karik la konsege mak bele koko fali iha oportunidade seluk, maibé tenke orgullu no konkista no hatudu kapasidade ida-idak nian hodi bele manán, dehan Prezidente KFP iha abertura teste ba sekretáriu munisipal sira iha salaun Aikurus Binani KFP, Matadouro, Dili iha tersa feira, (14/03/2023).

Tuir dadus iha sistema KFP, aplikantes ba vaga hitu ne’e aplikantes hamutuk nain 23 no admitidu nain 20 no la admitidu nain tolu. Ba kandidatus ne’ebé admitidu ona ba teste eskrita hamutuk nain 20 kompostu husi feto nain rua no mane nain 18.