Atu asegura Funsaun Públika ida ne’ebé profisional, imparsial, no transparente ho baze ba prinsípiu no valor “Boa Governasaun” KFP fó mós prioridade ba Servisu Inspesaun no Auditoria nian, iha ne’ebé tau prioridade hodi reuni Auditor no Inspetor sira regularmente kada trimestre hodi diskute no fahe experiensia, halo avaliasaun ba servisu sira no identifika dezafiu sira ne’ebé mak hasoru iha servisu inspesaun no auditoria nian hodi bele melhora nafatin servisu sira la’o ho efisiente no efikáz liu tan hodi bele kontribui ba diak liu tab ba prinsipiu no valor boa governasaun iha futuru.
Komisariu portfóliu ba Disiplinar, Fausto Freitas da Silva reprezenta Prezidente KFP hato’o liafuan ne’e durante diskursu iha serimónia tomada de posse ba sub inspetor auditoria, Francelino Sarmento Martins iha Gabinte no Xefe Departamentu Apoiu CCLN, Jose Pinto iha salaun enkontru Ministériu Asuntu Kombatentes Libertasaun Nasionál, Caicoli, Díli, iha Tersa feira, (9/05/2023).
Komisáriu Fausto Freitas da Silva hateten, Servisu Inspesaun no Auditoria (GIA) importante tebes hodi asegura servisu ne’ebé instituisaun ida-idak hala’o, liu-liu asegura kumprimentu ba lei no regulamentu ne’ebé regula, jestaun ba rekursu humanu, jestaun finanseira no regula jestaun patrimonial iha setór públiku sira hotu. Parte seluk, servisu GIA maka halo fiskalizasaun hodi asegura kumprimentu ba lei no regulamentu sira, halo prevensaun no rekomenda solusaun ba irregularidade ne’ebé identifika hodi bele melhora efetividade servisu, la’o ho efisiente, efikáz, profisional, imparsial, no transparente ho baze ba prinsípiu no valor “boa Governasaun nian”. Tanba ne’e husu ba emposadu nain rua ne’ebé simu ona knar foun ne’ebé atribui halao ho responsibalidade hodi apoiu servisu Inspesaun no Auditoria nian atu bele la’o ho di’ak liu tan, hodi kontribui ba instituisaun ninia polítika prioridade sira ne’ebé mak define ona.
Komisariu Disiplinar KFP ne’e afirma, instituisaun ida livre hosi hahalok korupsaun no mal administrasaun depende mós ba servisu Inspesaun no Auditoria nian. Bainhira Inspesaun no Auditória nia dedikasaun no dezempeñu la’o ho profisional no imparsial atu kombate korupsaun no hahalok irregularidade sira hodi bele lori prestasaun servisu ida ho alta kualidade ba povu no nasaun. Enkoraja mós Sub-Inspetor emposadu, atu esforsu hodi konkretiza liu tan prosesu rekrutamentu iha servisu lor-loron hodi dezempeña funsaun ho kualidade hodi kontribui ba melloramentu servisu GIA nian ho inovativativu no profisionál, kontribui hodi produz no hasa’e kualidade prestasaun servisu ba públiku. Tanba dezempeñu neébe di’ak sai mós oportunidade hodi hadi’a kareira nu’udar Servidor Públiku. Partisipa iha serimónia tomada de posse ne’e, Ministru MACLN, diretor jeral ho nia estrutura ministériu.