Aileu, Ministra Edukasaun, Dulce de Jesus Soares, Prezidente Komisaun Funsaun Públika, Agostinho Letêncio de Deus, akompaña husi Prezidente Autoridade Munisípiu Aileu, Joao Bosco do Santos, iha segunda-feira ne’e (27/05/2024) fó posse no termu aseitasaun ba professores rejime espesial kareira dosentes iha munisípiu Aileu hamutuk 168 kompostu husi ensinu pre-eskolar nain 15, ensinu báziku nain 61, ensinu sekundária nain 30, ensinu tékniku vokasional nain 6 no ensinu rekorente nain 3.
Prezidente KFP, Agostinho Letêncio de Deus iha diskursu, husu ba emposadu sira simu posse atu tane aás étika profesionalizmu hodi hala’o knár nu’udar profesór iha papel no responsabilidade hanorin alunus ne’ebé sai ema ho étika no kualidade. Mentalidade no étika sai mós fatór determinante ba dezenvolvimentu alunus sira, hahú husi kualidade profesores sira nia hanorin ba alunus sira hodi forma mentalidade étika disiplina.
Autoridade KFP husu ba emposadus sira atu hatudu loyalidade, étika, disiplina, hatudu dezempeñu ne’ebé di’ak ba superior sira durante periodu probatóriu iha tinan rua nia laran.
Entretantu, Ministra Edukasaun Dulce de Jesus Soares durante diskursu sita liu kona-ba, abilidade professores sira nian, sai professores ne’ebé di’ak la’ós tanba saláriu no rekoñesimentu maibé, wainhira alunus ida hetan kualidade ne’ebé di’ak, ne’e orgullu ida ba profesór. Tanba nu’udar manorin presiza kuda metin étika, disiplina atu sai ezemplu ba alunus sira ne’ebé iha kualidade tuir matan dalan edukasaun nian.
Enkuantu diskursu Prezidente Autoridadee Munisípiu Aileu, Jõao Bosco do Santos enkoraza emposadu sira atu kontinua aprende, pasensia, haraik aan, badinas, pontualidade iha knár lor-loron nian n’uudar profesór, hatudu nafatin onestidade la’o tuir regra, obedese ba superior sira tau interese Estadu aas liu duke interese privadu. Hadomi profisaun nu’udar profesór sai modelu iha profisaun ne’ebé maka asume halo ema senti sateisfeitu profisaun nu’udar edukador, ejize resposbailidade hodi prepara rekursu ne’ebé di’ak ba serví Estadu atu sai lider ida hodi fó naroman ba ema seluk.
Serimónia posse no termu aseitasaun ba profesores ingresu espesial ba kareira dosentes hala’o iha salaun Timor Klaran Munisípiu Aileu konta ho partisipasaun Sekretáriu Munisípiu Aileu, autoridade sivil no militar, relijioza, diretor eskola, no familia emposadus.
