Ministériu Justisa Hamutuk ho Entidade Hotu Diskute Preparasaun Kombate Brankeamentu Kapitais No Mós Finansiamentu Ba Terrorizmu Nian

Diskusaun liu husi Workshop kombate Embrangkeamentu Kapital ne’e sai pertinente ba futuru Timor-Leste, Diretor Geral Asuntu Administrasaun Polítika no Justisa, Salvador da Costa Fernandes ne’ebé reprezenta Ministru Justisa hato’o lia hirak ne’e antes fó abertura ba Workshop II faze iha Ministériu Justisa tersa-feira (26/04).

Objetivu ba workshop virtual ida ne’e atu rona hanoin sira husi entidade hotu no hanesan medida importante ida atu bele haklean liu tan kuñesimentu ba halo preparasaun di’ak hodi hasoru prosesu evaluasaun mutúo ba Timor-Leste ne’ebé sei akontese iha tinan 2022-2023.

Durante diskusaun iha workshop ne’e iha aprezentasaun virtual husi Diretora Mutual Evaluations Ásia Pacific Group on Money Laudering, Suzie Lohite fó ninia hanoin ruma ne’ebé konstrutivu atu nune’e bele prepara polítika Timor-Leste nian iha futuru ne’ebé di’ak liu tan.

Hanesan Reprezentante Ministru Justisa hato’o nia apresiasaun no apoiu ba entidades importante sira hotu ne’ebé bele realiza eventu ne’e liu-liu liga ho kombate brankeamentu kapitais no mós finansiamentu ba terrorizmu nian.

Realizasaun worshop ne’e kooperasaun entre Ministériu Justisa ho Comissão Nacional para a Implementação das medidas destinadas a prevenção e Combate ao Branqueamento de Capitais e ao Financiamento do Terrorismo (CNCBC).

Tuir ajenda, workshop ba III faze sei hala’o iha kinta-feira (28/04) semana ne’e iha Ministériu Justisa, enkuantu I faze hala’o tiha ona iha fulan Novembru tinan kotuk.

Partisipa iha Diskusaun ne’e KAK, PSIK, Inspetor Jeral Estadu, SERVE.IP, Inspetora Komisaun Funsaun Públika, Sonia da Silva Soares reprezenta Prezidente KFP partisipa iha enkontru sai hanesan membru ba ekipa preparativu ba prosesu evaluasaun Brankeamentu kapitais no seluk tan.

Tagged