Kinta-feira, 20 Dezembru 2024 – Ministru Prezidensia Konsellu Ministru fó posse ba Komisária KFP, Anita Tavares de Jesus Ribeiro hodi kompleta ba IV mandatu KFP.
Komisaun Funsaun Públika moris ho reforma administrativa ne’ebé implementa husi IV Governu Konstitusionál, iha tinan 2009, ho objetivu atu garante funsaun públika ida ne’ebé imparsiál polítikamente, imparsiál, bazeia ba méritu no kaer padraun profisionalizmu ne’ebé aas, ho objetivu atu presta servisu ho kualidade ba Estadu no povu Timor, Ministru Prezidénsia Konsellu Ministru Agio Pereira ko’alia lia ne’e iha diskursu serimónia tomada de posse ba Komisária Anita Tavares Ribeiro de Jesus iha salun enkontru PCM, Palásiu Governu.
Ministru Prezidénsia Konsellu Ministru, Agio Pereira afirma Tinan 15 hafoin nia kriasaun, Komisaun Funsaun Públika, agora iha mandatu dahaat, hasoru dezafiu sira ne’ebé Programa Governu Konstitusionál da-IX hamosu. Dezafiu sira ne’e inklui hasa’e efikásia, efisiénsia no profisionalizmu Administrasaun Públika nian, ba prestasaun servisu públiku ne’ebé di’ak liu, nu’udar fatór krusiál ba implementasaun polítika no programa dezenvolvimentu nian ne’ebé lori ba redusaun pobreza no progresu no bem-estar populasaun nian.
Planu reforma nia objetivu inklui estabelesimentu estrutura foun ba funsaun públika no aumenta investimentu iha dezenvolvimentu kapitál umanu, hodi atrai no mantein talentu joven sira ba funsaun públika.
Foin lalais ne’e, Parlamentu Nasionál aprova lei ida ne’ebé fó autorizasaun ba Governu atu implementa limite idade ba servisu ativu ba funsionáriu públiku sira. Regulamentu kona-ba limite idade nian konstitui oportunidade ida ba renovasaun funsaun públika ida-ne’e no ba mudansa ida iha ita-nia funsionáriu públiku sira-nia mentalidade.
Iha fatin hanesan, Komisaria eleita hatete ho konsiente duni katak nu’udar komisária, tenki kumpri plenamente ba responsabilidade ne’ebé tau iha hau-nia kabas hodi fó susesu ba implementasaun programa no prioritarias KFP nian durante mandatu nebe determina ona.
Mentalidade funsionáriu públiku sira ohin loron nian presiza marka ho valór sira hanesan proatividade, empatia no kompromisu ba exelénsia. Ida-ne’e signifika komprende nesesidade sira sosiedade nian no oferese solusaun sira ne’ebé ágil no efetivu. Ho liafuan badak, sai liu fali de’it ema ne’ebé halo knaar. Atu sai ajente transformasaun nian, dudu husi étika, transparénsia, responsabilidade no integridade, hodi garante katak asaun ida-idak reflete duni interese públiku loloos.
Ho prontidaun atu servisu hamutuk ho Estrutura KFP mandatu dahaat nian ba oin, ho evolusaun tempu ne’ebé era globalizasaun iha administrasaun públika fó impaktu ba kompleksidade servisus iha KFP, nune’e exije servisu iha ekipa nu’udar sasukat determinante hodi buka solusaun ba problema no dezafiu sira ne’ebe sei enfrenta, dehan komisaria Anita Tavares Ribeiro de Jesus.
Komisária Komisaun Funsaun Públika foun, Anita Tavares Ribeiro de Jesus ne’ebé nomeia husi Konsellu Ministru baze ba rezolusaun nú.61/2024, 21 novembru hodi hala’o knaar durante tinan haat ba mandatu da-haat KFP nian hahú 20 Novembru 2024 to’o 22 Novembru 2028.
Partisipa iha serimónia posse ne’e hanesan Sekretariu Estadu Komunikasaun Sosial, Sekretariu Estadu Igualdade, Provedór PDHJ, Komisáriu KAK, Inspetor Inspetoria Jeral Estadu, reprezentante Ministra Edukasaun, Prezidente no Komisárius KFP no estutura, Diretor Jeral PCM no Xefe Gabinete Minsitru PCM.
