MJ-KFP Ofisialmente Abertura ba Modalidades Desportu iha Âmbitu Komemorasaun Loron Funsaun Públika

Horseik, Kinta-feira (23/05/2019) – Prezidente no Komisarius Komisaun Funsaun Públika hamutuk ho Komisaun Organizadora Ministeriu Justisa ofisialmente abertura ba modalidade desportu iha âmbitu Komemorasaun Loron Nasional Funsaun Públika ho tema “Impulsiona Valor de Mens Sana In Corpore Sano, Solidaridade e Amizade Entre Funcionários Públicos de Ministérios e de Institutos Integrados na Administração Indireta do Estado”iha Sekretariu Estadu Juventude no Desportu (SEJD), Lecidere, Dili.

Prezidente KFP, Faustino Cardoso Gomes durante halo intervensaun,  husu ba klubu Desportivu hamutuk 42 Feto-mane mai husi kada Ministeriu, Orgaun soberanu, no ajensia autonomas  atu kontinua kuda metin disiplina fo susesu durante jornada desportiva fulan ida tomak  bazeia ba marcha Funsaun Públika.   

“Atividade Kompetisaun Modalidade Desportu  ho Tema ‘”Mens Sana In Corpore Sano” sai fundamentu prinsipal hodi hamosu aktividade  desportiva  atu halo fresku Funsionariu sira hanoin, Saúde no mentalidade, no mós hametin Unidade entre funsionariu no ministériu sira, liu husi aktividade desportu  iha tinan 2019. Partisipasaun atividade desportu ne’e maximu husi instituisaun sira, tamba ne’e presija komunikasaun diak entre komisaun organizadora husi ministeriu Justisa ho kada ministeriu no instituisaun sira hodi labele  prezudika ba aktividade servisu atendimentu públiku iha ida-idak nia servisu fatin,” haktuir Faustino Cardoso Gomes durante nia intervensaun iha abetura atividades desportiva iha SEJD.

Prezidente KFP  hato’o mós parabéns ba Ministeriu Justisa ne’ebé tinan ne’e sai uma nain, halo preparasaun ne’ebé diak hahu husi aktividade kuda ai oan, kompetisaun desportiva, Jornada lao tuir ain fatin Saudozu Prezidente Nicolao dos Reis Lobato inklui aktividade sira seluk hodi komemora loron Nasional Funsaun Públika ba dala lima ne’ebé sei monu iha loron 15 fulan Jullu tinan 2019.

Aktividade kompetisaun desportiva tinan ne’e sei iha mós taxa rotativa, no fó mós parabéns ba instituisaun no ministériu sira ne’ebé mak kompete iha atividade ne’e dehan Ministru Justisa durante nia intervensaun.

Hafoin abertura loke ofisialmente husi Ministru Justisa, Manuel Carceres da Costa,  kontinua kedas ho jogo fustal feto husi Prezidensia Repúblika no Ministeriu Petroleo Rekursu Minerais (MPRM), basket ball feto Ministeriu Justisa ho Ministeriu Interior no Ministeriu Justisa ho Komisaun Anti Korupsaun (KAK), volley ball feto husi Ministeriu Justisa kontra SCOOP.

Entretantu durante jogo ekipa futsal Feto Prezidensia Repúblika manan MPRM ho skor 7-1.

Serimonia abertura ne’e partisipa husi Diretor Jeral husi ministeriu no instituisaun hotu, Vise Ministru MOP, Sekretariu Estadu SEJD no Komisariu KAK.