Komisaun Funsaun Públika harií iha IV Governu Konstitusional tinan 2009 ezerse ona nia funsaun durante tinan 14 ho espetativa ida sai ajensia Estadu ida ne’ebé antes ne’e tutela ba Primeiru Ministru hodi tulun dezenvolve aparellu funsaun públika Estadu nian hodi hetan profesionalizmu, izenta, neutru, servisu ho objetividade. Bainhira halo sasukat ida ezistensia KFP tinan 14 evolui di’ak tebes, maibé iha prosesu dialetiku instituisaun Estadu la’o di’ak ezijensia foun mós mosu barak no Estadu tenki adkiri kapasidade, fleksibilidade subsiente hodi adapta an, Ministru Prezidénsia Konsellu Ministru Agio Pereira ko’alia lia ne’e iha diskursu serimonia tomada de posse ba Komisáriu Agapito da Conceição iha salun enkontru PCM, Palásiu Governu tersa feira, (3/10/2023).
Ministru Prezidénsia Konsellu Ministru, Agio Pereira afirma ezistensia KFP iha periodu ukun an tinan 20 tempu halo reflesaun ba deklarasaun Primeiru Ministru, Kayrala Xanana Gusmão nian ne’ebé hato’o iha Parlamentu Nasional kona-ba auditoria ne’ebé la’os atu hatama ema ba prizaun maibé, atu identifika frakeza sira bazeia ba motto IX Governu katak “halo buat sira ne’ebé seidauk halo, hadia buat sira ne’ebé seidauk di’ak, hatutan buat sira ne’ebé halo tiha ona mais seidauk hotu”. Tanba ne’e IX Governu ho nia estrutura lidera husi Primeiru Ministru ho membru Governu nain 22 fahe ba klase karakter sosial no karakter produtivu, ho vise Primeiru Ministru nain rua ho knar apoiu Primeiru Ministru iha servisu koordenasaun. No Primeiru Ministru kaer de’it área estratéjiku neen ekonomia, auditoria, Greater Sunrise, G7+, inklui desentralizasaun.
Enkuantu desentralizasaun relevante ba Komisaun Funsaun Públika hodi halo renovasaun digitalizasaun, fó kapasitasaun ba funsionáriu sira atu halo kotaktu online ba munisípiu hotu Komisaun Funsaun Públika nia dever sentral ida fó apoiu ba ajensia Estadu sira hotu hodi halo rekrutamentu ne’ebé di’ak, reforsa kapasidade governasaun iha munisípius hodi asegura prosesu eleisaun ba Prezidente Autoridade no Administrador Munisipal no ajensia lokais Governasaun. Tanba ne’e husu ba Prezidente KFP, komisárius no funsionáriu sira hotu iha Sekretariadu atu servisu ho Governu liuliu ministériu relevantes hodi asegura prosesu ho responsabilidade profesional. Polítika estratéjika ida seluk maka adezaun Timor-Leste nian ba ASEAN ne’ebé relevantes mós ba servisu KFP hodi haree ba socio-cultural ho nia objetivu tulun no kuidadu fó oportunidae hanesan ba sidadaun hot-hotu kria servisu hamutuk tulun Governu hodi alkansa objetivu.
Molok remata Ministru Prezidénsia Konsellu Ministru, Agio Pereira felisita mós Komisáriu Agapito da Conceição ho votus susesu nu’udar komisáriu tanba durante tinan barak servisu iha KFP kuñese dezafius no komplesidade ne’ebé iha servisu hamutuk ho Prezidente no komisáriu sira atu buka solusaun hamutuk hodi servi ba povu no nasaun ho di’ak liu tan.
Entretantu Komisáriu Agapito da Conceição agradese ba fiar husi Parlamentu Nasionál hodi asume responsabilidade nu’udar komisáriu iha Funsaun Públika ho mandatu tinan rua.
Ho esperensia profesional ne’ebé hetan durante tinan 15 servisu iha Komisaun Funsaun Públika sei hakaas aan servisu ho profesionalizmu hodi halo tuir prinsipiu imparsialidade no valores funsaun públika ne’ebé hatur ona iha lei nú. 7/2009 no promete kontribui atu evita prátika diskriminasaun ba grupu, rasa no kór iha funsionalizmu públiku, hodi kaer metin de’it ba interese nasionál. No kompromete sei hamutuk ho Prezidente no Komisáriu sira seluk hodi kaer lisuk funsaun públika ida ne’ebé kredivél hodi servi di’ak liu tan ba públiku, dehan Komisáriu KFP, Agapito da Conceição.
Komisáriu Komisáriu Komisaun Funsaun Públika foun, Agapito da Conceição ne’ebé eleitu husi Parlamentu Nasionál kontinua hodi hala’o knár durante tinan rua ba mandatu datoluk KFP nian hahú 29 Setembru 2023 to’o 29 setembru 2025.
