Komisáriu Komisaun Funsaun Públika Portefóliu ba Forsa Traballu iha Funsaun Públika, José Telo Soares Cristóvão no Vise Ministru Saúde ba Fortalesimentu Institusional Saúde, José dos Reis Magno realiza asinatura memorandu entendimentu entre Ministériu Saúde ba iha kapasitasaun professionais saúde ho Universidade Airlangga no Universidade Gadjah Mada, Institutu Ilmu Kesahatan Kediri (IIK).
Objetivu husi asinatura MoU ida ne’e atu fó kapasitasaun ba rekursus umanus hanesan parte integrante no importante iha sistema servisu saúde, profesional saúde ne’ebé kapasitadu no iha abilidade servisu ne’ebé di’ak no hatudu prontidaun hodi serví nu’udar savi ba dezenvolvimentu saúde iha Timor-Leste. Nune’e Ministeriu Saúde liu husi Institutu Nasionál Saúde Timor-Leste halo elaborasaun posibilidade tomak hodi nune’e bele haruka profesionais saúde sira ba kontinua sira nia estudu iha Universidade no Institutu saúde sira ne’ebé iha rai liur inklui Nasaun Indonézia.
Alende asinatura memorandu entendimentu ho Universidade tolu ne’e ba iha formasaun no kapasitasaun no mós bolsa estudu ba funsionárius profisionais saúde nian iha área sira importatíssimu ba iha mestradu no doutoramentu iha área sira hanesan saúde públika, siensia medisina tropikal iha área espesializadu parasitolojia, siensia medikal molecular medicine, siensia medikal histologia no biologia, área nutrisaun, área ocupational health, saúde maternu infantil, saúde ambiental, no tékniku laboratóriu nian.
Hafoin asinatura ekipa hala’o mós vizita no monitorizasaun ba iha bolseiru Timoroan sira ne’ebé daudaun ne’e hala’o hela estudu iha Universidade UNAIR Surabaya, UGM Jogyakarta, Institut Ilmu Kesahatan Kediri (IIK)
Partisipa asinatura memorandu entendimentu ne’e mai husi instituisaun sira hanesan Institutu Nasionál Saúde Públika Timor-Leste (INSP-TL), Fundu Dezenvolvimentu Kapital Umanus (FDCH), Institutu Nasional Administrasaun Públika (INAP), Komisaun Funsaun Públika no Ministériu Saúde ne’ebé iha vizita traballu ne’e hala’o iha 4 -11 maiu 2024, iha Universidade UNAIR Surabaya, UGM Jogyakarta, Institutu Ilmu Kesahatan Kediri (IIK).
