Iha tinan 2023 KFP no ekipa integradu atu kontinua buka disemina kuadru legais ba postu 10, nune’e realiza enkontru dahuluk ne’e hodi rona no buka prepara hodi bele iha espíritu no misaun ida de’it ba partilla informasaun sira relasiona ho regras, prosedimentu, direitus, deveres ba funsionáriu no ajente administrasaun públika sira iha terenu.
Bazeia ba akordu kuadrilateral ‘’Boa Governasaun’’ entre Komisaun Funsaun Públika, Komisaun Anti Korupsaun, Provedoria Direitus Humanus no Justisa no Inspetoria Jerál Estadu, ne’ebé estabelesidu iha tinan 2019 no hafoin iha ninia andamentu, ekipa refere alarga no envolve mós instituisaun relevante sira hanesan Diresaun Jerál Patrimóniu Estadu-Ministériu Finansas, Sekretária Estadu Igualdade no Inkluzaun, Ministériu Edukasaun Joventude no Desportu, Ministériu Saúde, Institutu Nasional Saúde inklui Ministériu Administrasaun Estatal nu’udar parte husi ekipa integradu ne’e.
Tuir planu anual Komisaun Funsaun Públika iha tinan 2023 nian sei kontinua atividade hanesan ba postus administrativus 10 maka tama ona iha planu.
Iha abertura, Prezidente hateten, iha tinan sira liu ba inklui tinan kotuk 2022, ita hamutuk iha misaun ida de’it, ita tuun ba baze hodi buka haklaken, disemina liu tan informasaun ligadu ho kuadrus legais Funsaun Públika ne’ebé inklui direitus no deveres funsionárius públikus sira.
Baze ba diseminasaun sira ne’ebé la’o iha tinan kotuk ekipa sira sempre tun hodi partilla informasaun sira ne’ebé mak sai hanesan lisaun aprendida bazeia ba observasaun sira iha terenu, Ministériu sira ne’ebé maka ninia prezensa ne’e makas iha kra’ik to’o iha baze ne’ebá no sempre hasoru problema oin-oin de’it, lori tama hotu, hanesan edukasaun nian ba professores sira, edukasaun nian ba médiku, enfermeirus, parteiras no teknikus aliadus, husi sira nia perspektivu oinsá atu liberta husi moras oin-oin deit. Ne’ebé, ida ne’e maka ita la’o durante ne’e no espíritu ida servisu hamutuk ne’e ita mantein nafatin.
“Husu atu prepara a’an hodi tuun ba baze ho espíritu hanesan, atu konsensializa informasaun no asegura oinsá maka sira nia direitus no deveres sira bele implementa tuir instituisaun ida-idak ninia situasaun no responsabilidade. Saúde ni’an mós agora mai ho servisu foun ida liu-liu atu oinsá maka esklarese iha kraik ne’ebá ne’e la’ós de’it sira nia rejime professional saúde ninian maibé, ho instrumentu tékniku operasional sira ne’ebé maka foin lalais Ministériu aprova inklui mós alterasaun ba dekretu lei 13/2012 kona-ba profesionais saúde ninian, ne’e importante tanba ita atu tama ona ba faze de implementasaun. La’ós ona diskusaun atu hadia/altera, maibé ita tenke iha desizaun ida klaru ba iha avante atu oinsá maka implementa efetivamente. Agora liga ba SEII ne’e ninia papél importantíssimu, tanba ita presiza iha funsaun públika ida ne’ebé inkluzivu ‘’Oinsá maka asegura partisipasaun másima husi ita nia feto maluk sira no au mezmu tempu oinsá maka ema ho defisiénsia sira ne’ebé mai husi parte MSSI ninian atu mós ativamente partisipa iha funsaun públika ne’e. Mais keta haluha katak ita ba diseminasaun ne’e tenke lori ho defisiente sira, Sr. José husi Ministériu Edukasaun” .
esplika Prezidente KFP iha enkontru ho ekipa integradu ba diseminasaun nian, iha sala enkontru KFP iha loron sesta feira, (03/02/2023).
Prezidente KFP fiar katak, enkontru ida ne’e ita hein katak, bele sai output ida efetivu, hodi nune’e iha ita nia lala’ok tuir mai ne’e bele la’o ho efisénsia no efikásia.
Enkontru ne’e partisipa husi Prezidente Komisaun Funsaun Públika, Faustino Cardoso Gomes, Komisáriu asuntu Disiplina Komisaun Funsaun Públika, Fausto Freitas da Silva, MSSI, SEII, PDHJ, IJE, KAK, MEJD, Diresaun Jeral Jestaun Patrimoniu Estadu – Ministériu Finansas no ekipa husi SKFP nian.
