Kuarta feira, 22/11/2023 – Programa IX Governu Konstitusional durante tinan lima mai maka atu kria kodisaun ba dezenvolvimentu ekonomiku no krisaun empregu ne’ebé la’ós atu hatama ema atu servisu iha Funsaun Públika ho númeru ne’ebé boot. Tanba ne’e IX Governu Konstitusional sei halo reforma ida ne’ebé di’ak atu kontribui ba Polítika desentralizasaun, presiza kada Munisípiu funsionariu ne’ebé kualifikadu, tenki fó valor ba funsionariu ne’ebé iha ona esperensia servisu no la’ós hatama ema ne’ebé lahatene servisu hodi halo buat hotu paradu.Premeiru Ministro Kayrala Xanana Gusmao hato’o liafuan ne’e durante diskursu iha serimonia posse ba Prezidente KFP nomeadu, Agostinho Letêncio de Deus, Komisariu José Telo Soares Cristóvão no Komisaria Maria Domingas Fernandes Alves iha kuarta feira ne’e iha edifisiu Komisaun Funsaun Públika, Matadouro Díli.
Xefe Governu Kayrala Xanana Gusmão afirma, konstrusaun Estadu maka atu hari’i, hadia, konsolida instituisaun Estadu inklui Komisaun Funsaun Públiku, tanba funsionariu públikus sai nu’udar fatór importante ida atu implementa programa Governu hodi serbí ba povu no nasaun Timor-Leste. Tanba ne’e husu ba Prezidente no komisariu sira foun ne’ebé hetan konfiansa liu husi desizaun Konsellu Ministru ba mandatu tinan lima mai, kaer metin prinsipu onestidade, imparsialidade hodi hatudu funsionariu publikus ne’ebé kompetentes hodi ezekuta programa. Ezije responsabilidade iha atuasaun servisu lor-loron atu hakbit Estadu iha nia funsaun hodi serbí dudu dezenvolvimentu ekonomiku ba povu Timor-Leste ne’ebé hela iha área remotas, ne’ebé seidauk senti rezultadu husi ukun rasik aan durante tinan 23.
Molok remata Kayrala Xanana Gusmão husik hela mensajen ba Prezidente foun no komisariu sira atu tau iha prátika kompromisu ne’ebé ko’alia iha diskursu atu implementa planu baze ba orsamentu ne’ebé iha no labele sai promesa falsu.
Entretantu Prezidente Komisaun Funsaun Públika nomeadu, Agostinho Letêncio de Deus iha nia diskursu hateten, aperfesionamentu ba Administrasaun Públika importante ba konstrusaun Estadu hodi kontribui ba estabilidade sosial atu hametin populasaun nia konfiansa ba instituisaun Estadu sira. Baze ba prinsipiu kona-ba Administrasaun Públika ida ne’ebé di’ak maka buka tane aas interese públiku.
Administrasaun Públika mai ho organizasaun ida bem estruturadu hodi evita burokratizasaun hodi garante servisu Administrasaun Públika besik liu ba populasaun. Tanba ne’e reforma Administrasaun Públika sai nu’udar programa prinsipal ida iha programa IX Governu Konstitusional nian, profesionalizmu iha funsaun públika nu’udar ferramentu ne’ebé mais importante atu impulsiona dezenvolvimentu no fortalese sistema demokrasia, no sai mós xave ba alkansa justisa no prospridade ba sosiedade, kresimentu ekonomiku. Estabilidade hodi hametin valor demokrasia sira. Nesesita funsionariu públiku nia profesionalidade ne’ebé bele responde ba dezafiu mudansa kauza husi kompetetiva globalizasaun nivel nasional no internasional, dehan Prezidente KFP.
Tuir Agostinho Letêncio de Deus katak, mehi atu atinji profesionalidade funsionariu ida-idak nian, ezije jestaun funsaun públika ne’ebé forte, bazeia ba prinsipiu meritokrasia ne’ebé bazikamente hare objetu kompetensia, dezempeñu, kualifikasaun no esperensia.
Nia afirma liga ba Polítika IX Governo ba programa reforma administrasaun públika, nu’udar Prezidente KFP sei hamutuk ho komisariu sira hodi diskute programa prinsipal sira atu bele halo transformasaun jestaun funsinariu públiku ida ne’ebé efisiente, efikas, bazeia ba sistema méritu ne’ebé adaptivu tuir kondisaun real Timor-Leste nian. Tanba ne’e programa prinsipal ne’ebé define maka kontinua dezenvolve sistema digitalizasaun jestaun funsionalizmu públiku, melloramentu Prosesu Planeamentu no Rekrutamentu, Dezenvolvimentu kompetensia funsionariu públiku, padraun kareira FP no dezenvolve kapasidade jestaun rekursu umanu ba melloramentu prestasaun servisu ba públiku no komunidade.
Molok remata Prezidente KFP foun Agostinho Letêncio de Deus husu katak, atu implementa programa hirak ne’e presiza apoiu husi instituisaun Estadu nu’udar instrumentu ida ba implementasaun polítika ne’ebé Governu define ba servisu funsionalizmu públiku.
Partisipa iha serimonia tomada de posse membru Governu hotu, reprezentante embaixadora Austrália, ILO, PDHJ. IGE. FDCH, KAK, sesante Komisarius I-III mandatu no estrutura Sekretariatu KFP.
