Segunda-Feira, 18 Fevereiru 2019 – Prezidente Komisaun Funsaun Públika, Faustino Cardoso Gomes akompaña husi Komisarius nain tolu, hodi hala’o enkontru ho Primeiru Ministru, Taur Matan Ruak hodi halo diskusaun kona-ba Rezolusaun Promosaun ba Funsionario Publiku.
Hafoin enkontru Presidente KFP, Faustino Cardoso Gomes esplika ba jornalistas sira iha Palasiu Governu kona-ba agenda importante durante enkontru ho Primeiru Ministru Taur Matan Ruak, maka proposta rezolusaun Governu kona-ba definisaun vaga ba promosaun funsionarius publikus.
Funsionarius Públiku ne’ebé mak prense rekezitus hamutuk 10.455 mak prense rekezitus atu kompete, maibé 10% ba kada kategoria sei promove deit funsionariu nain rihun ida resin.
KFP mos atualiza ba xefe governu proposta dekretu kona-ba planeamentu Forca Traballu ne’ebé prepara ona, tempu badak sei haruka ba Primeiru Ministru atu analiza, tamba durante ne’e prosesu rekrutamentu la bazeia ba planeamentu nesesidade Forsa Traballu “kona-ba ema numeru hira, ema ho kualifikasaun saida”, maibé bazeia deit ba orsamentu ne’ebé iha. Alende ne’e atualiza mós situasaun realokasaun funsionariu sira husi RTTL,EP no ba futuru oinsa KFP kontinua halo komunikasaun ho Ministeriu Obras Públikas kona-ba planu transformasaun EDTL ba empreza públika ba Primeiru Ministru.
Enkontru ne’e partisipa mos Komiasaria Maria Domingas Fernandes Alves, assuntu servisu Reforma no Pensaun, Komisariu António Freitas, asuntu Prosesu Disiplinar no Komisariu José Telo Soares Cristovão asuntu Formasaun, SIGAP no Forsa Traballu.
