Sesta-feira, 15 Marsu 2024 – Primeiru Ministru, Kay Rala Xanana Gusmão no Prezidente Parlamentu Nasionál Maria Fernanda Lay ofisialmente halo abertura ba teste eskrita ba bolsa kandidatus ba professores ho tema “Juntos Construímos a Nossa Nação Através de uma Educação de Qualidade” ne’ebé mak hala’o iha salaun aí-kurus Binani Komisaun Funsaun Púbika.
Prezidente Komisaun Funsaun Públika, Agostinho Letêncio de Deus hateten, konkursu ne’e hahú husi prosesu aplikasaun ba vaga bolsa ba kandidatu dosente ne’ebé ema hamutuk 14.152 mak aplika. Husi total ne’e, aplikantes admitidus ba teste eskritu eletróniku hamutuk 13.021 no parabéns ba inan feton sira, tanba iha teste ne’e númeru dominante mak feto ho total 7.924 no mane hamutuk 5.097.
Total aplikante ne’ebé la admitidu (não admitidos) iha prosesu verifikasaun dokumentu hamutuk 1,131 ne’ebé kompostu husi feto 678 no mane 453. Teste ne’e la’o durante loron 22 ba turnu haat kada loron, ho total kandidatus 150, ne’ebé hahú 15 marsu to’o 16 abril 2024, dehan Prezidente KFP iha abertura teste ba professores iha salaun Aikurus Binani.
Iha tempu hanesan Ministra Edukasaun Dulce esplika katak, governu promove kualidade ensinu iha Timor-Leste, ho kualidade ba iha prioridade prgorama IX Governu Konstitusional nian ne’ebé rekoñese hanesan elementu fundamental ida ba dezenvolvimentu ita nia nasaun. Ita hotu hatene katak, ensinu kualidade mak mai ho professor kualifikadus no dedikadus hodi inspira no motivasaun ba alunu sira hodi alkansa susesu akadémiku ho ninia grau pessoal hodi garante ba kada alunu.
Nune’e Primeiru Ministru, José Alexandre Gusmão “Kay Rala Xanana Gusmão” akresenta, sistema ida ne’ebé di’ak ba funsionáriu sira hamosu transparansia ne’e mak hanaran teste eletróniku ne’e di’ak teb-tebes, kandidatu sira esforsu aan ba lalika lakon esperansa katak, la liu agora karik nafatin esforsu aan liu tan hodi prepara aan buka fali seluk.
Serimónia abertura ne’e hetan partisipasaun husi Prezidente Parlamentu Nasionál no Prezidente Komisaun G no Destintu Deputadu sira, Ministru Ensinu Supeior, Sekretáriu Estadu Ensinu Edukasaun, Sekretáriu Estadu Komunikasaun Sosial no funsionárius Ministériu Edukasaun no Sekretariadu KFP.
