PM Taur Matan Ruak fo Posse ba Komisarius KFP Mandatu Datoluk

Tomada de Posse ba Komisarius KFP

Primeiru Ministru Taur Matan Ruak fo posse ba Prezidente no Komisáriu nain rua ne’ebe indika Governu. Faustino Cardoso Gomes reeleito ba Prezidente, Sra. Maria de Jesus Sarmento no mós Sra. Carmeneza Monteiro nudar Komisaria KFP mandatu datoluk nian hodi lidera Administrasaun Públika Timor-Leste.

Iha diskursu Prezidente“agradese ba konfiansa tomak husi S.E Primeiru Ministru no VIII Governu Konstitusional hodi tau konfiansa mai ami hodi lidera Funsaun Públika. La’os foun ba ami maibé, dala ida tan pesoalmente atu kontinua servisu hala’o knar importante tebes no misaun ida ne’ebé dezafiante maibe nafatin iha komprimisiu, optimismu sei konkista susesu, hodi apoia politika governu, programa governu nian. Ami sei aproveita oportunidade ida ne’e ho ami nia kbiit tomak matenek tomak klaru! konta nafatin ho apoiu politika atu oinsa Komisaun Funsaun Publika bele la’o diak tuir espektativa asegura seguransa, aspirasaun funsionarius públikus, no politika Governu nian,” dehan Faustino Cardoso Gomes ne’ebé nomeadu ba daruak hodi kontinua lidera Funsaun Públika Timor-Leste.

Prof. DR. Faustino Cardoso Gomes, releitu ba Prezidente KFP, asina hela termu de aseitasaun, Posse husi PM
Foto: Media CFP@2020

Komisaun Funsaun Públika nia servisu haree ba jestaun rekursu umanus iha setór públiku, knar ida ne’e Sua Excia Primeiru Ministru nudar Xefe do Governu  iha âmbitu reforma atu asegura efikasia, kualidade, efesiensia funsionamentu KFP ne’ebé tutela direta husi S.E Primeiru Ministru.

“Ami kompremete nafatin iha komunikasaun, prontu rona orientasaun husi Sua Excia PM kona-ba lalaok KFP no mós Funsaun Públika ein jeral tuir valores no prinsipiu sira ne’ebé mak sustenta funsionamentu Funsaun públika tuir dinámika lala’ok estadu no prontu halo komunikasaun, koordenasaun ho membru governu sira iha âmbitu halo tuir kompromisiu konstitusional. Durante mandatu daruak konsege halo dinamizasaun ba KFP, hatan mós ba espetativa funsionarius públiku sira iha âmbitu kapasitasaun, formasaun, asegura professionalizmu Funsaun Públika, rekrutamentu ba méritu, igualdade bazeia ba jéneru, nune’e mós prinsipiu inkluzivilidade ba defisiensia sira hodi bele asesu ba desenvolvemtu kareira iha funsaun públika. Kompremete mós ba moderizasaun Funsaun Públika hodi asegura efesiensia no efikasia funsionamentu Administrasaun Públika,” hatutan Prezidente KFP iha nia diskursu iha serimonia posse ne’e.

Primeiru Ministru Taur Matan Ruak kongratula no agradese mós ba komisarius sesante sira ba kontribuisaun Administrasaun Públika no apresia ba sira nia prestasaun servisu deseja ba sira nia saúde, vida professional iha fatin seluk.

Kontribuisaun Administrasaun Públika presija fatores importante mak rekursu umanus hodi viabiliza no presta servisu ho di’ak ba povu. Maske hasoru dezafius oi-oin, maibé Funsaun Públika firme la’o nafatin.

“Iha Administrasaun Publika atu funsiona presija fatores ida maka ita nia rekursus umanus, iha ita nia historia Timor nian ita nia Nasaun ne’e kiik povu ida kiak sikat iha Nasaun boot sira klaran, laiha meius, laiha rekursus, maibé ho ita nia vontade, pasensia ita manan difikuldade barak iha enfraestrutura, fasilidade no promosaun, maibé espera katak, iha tempu badak ita bele servisu hamutuk, pasu pur pasu ita bele hadia di’ak liutan funsionalismu públiku hodi serve ita nia rai, serve ita nia povu no dezenvolve ita nia nasaun,” afirma Xefi Governu, S.E Primeiru Ministru VIII governu.

Atu kompleta Komisarius sira iha Komisaun Funsaun Públika, Komisariu nain rua seluk sei nomeia  husi Parlamentu Nasional.

Komisaria Carmeneza Monteiro asina termu aseitasaun/foto:Media CFP@2020
Komisaria Maria de Jesus Sarmento halo komprimisiu de honra/foto:Media CFP@2020
Diskursu Prezidente KFP Faustino Cardoso Gomes/foto:Media CFP@2020