Kinta-feira, 17/09/2026 – Prezidente Komisaun Funsaun Públika (KFP) hala’o reunião ho Embaixadora Austrália ba Association of Southeast Asian Nations (ASEAN) nian hodi halo diskusaun kona-ba Vizaun English Language Training for ASEAN (ELTAA) nian iha kontribuisaun ba adezaun ASEAN no importánsia dezenvolvimentu kapasitasaun lian Inglés ba Funsaun Públika ne’ebé hala’o iha edifisiu KFP, Matadoro Díli.
Iha reuniaun ne’e, Prezidente KFP Agostinho Letêncio de Deus hato’o apresiasaun kle’an ba apoiu no parseria husi Austrália iha hametin abilidade lian Inglés ba funsionáriu públiku sira Timor-Leste nian, hahú husi nia lansamentu, ELTAA kontinua buras hodi responde ba nesesidade Governu nian, habelar husi nia foku inisiál hodi apoia funsionáriu sira ne’ebé servisu iha área relevante ASEAN nian.
Presidente KFP hateten, ELTAA reprezenta investimento importante ida ba funsaun públika no ba funsionárius ne’ebé dadaun ne’e envolve maka’as liután iha servisu rejionál no internasionál, Governu Austrália fó apoiu no parseria hodi sustenta ka hametin programa ELTAA hodi asegura funsionárius no prepara ho di’ak atu envolve ho efetivu iha ASEAN.
Iha parte seluk Embaixadora Austrália ba ASEAN Tiffany McDonald hateten, valór husi programa ELTAA ne’e maka atu hatene lian inglés no la’ós de’it ba misaun servisu iha estranjeiru nian maibé, atu habelar treinamentu ne’e no profisiénsia lian inglês ba funsaun públika tomak, importante tebes no apoia membru ASEAN liu husi maneira oioin.
Embaixadora ne’e hatutan tan katak Governu Austrália hakarak fo parabéns ba parseria servisu tomak ne’ebé maka lideradu, espera katak liu husi programa ELTAA ne’e bele haluan no hakle’an liu tan no bele fó benefísiu iha ASEAN Timor-Leste. Sorumutu ne’e termina ho visita embaixadora akompana husi prezidente KFP, DFAT, DG-MNEC, PROSIVU no Manager LELI ba graduadus programa ELTAA nian ho objetivu atu partilla experiénsia durante aprendizagem no ELTAA nia apoia ba iha serbisu no responsabilidade sira ne’ebé relasiona ho ASEAN nian.