Horseik, 09 Abril 2019 – Prezidente Komisaun Funsaun Públika, Faustino Cardoso Gomes hala’o ekontru ho Prezidente Konsellu Imprensa ho nia ekipa tekniku sira hod koa’lia kona-ba estatutu ajentes administrasaun iha Konsellu Imprensa, no pedidu eis funsionariu RTTL nain tolu iha área arkivu no dokumentariu audio visual ne’ebé tuir planu sei hahú implementa iha tinan 2019.
Prezidente Komisaun Funsaun Públika, Faustino Cardoso Gomes hateten kona-ba estatutu ajentes administrasaun iha Konsellu Imprensa, laiha dalan atu transforma sai Funsionario Públika automatika, maibé tenki liu husi prosesu rekrutamentu tuir lei Funsaun Públika.
Tamba ne’e Presidente KFP rekomenda ba Konsellu Imprensa atu hatoo pedidu eskrita ida ba Primeiru Ministru, Taur Matan Ruak atu foti desizaun kona-ba situasaun Ajentes Administrasaun ne’ebé durante ne’e servisu iha Konsellu Imprensa. No bainhira xefe Governu foti desizaun ba prosesu rekrutamentu KFP prontu atu fó apoiu rekursu umanos no equipamentus hodi aselera prosesu rekrutametu ho lalais.
Kona-ba Planu Konsellu Imprensa hatoo pedidu husu eis funsionariu públiku RTTL nain tolu nebe iha esperensia iha área audio visual, no kapasidade analiza ba konteúdu notisia. Prezidente KFP Faustino Cardoso Gomes esplika, maioria eis funsionariu RTTL koloka ona ba ministeriu no instituisaun estadu nian iha Dili no munisipiu enkuantu oituan deit mak hela iha KFP tuir nesesidade servisu kada diresaun, maibé haktuir nia bainhira Funsionariu balun ba reforsa servisu iha Konsellu Imprensa bele viola lei tamba kria dualismo servisu tamba salariu ne’ebé diferente no bele kria desentementu iha servisu loro-loron nian la la’o diak hanesan akontese iha RTTL.
Prezidente KFP mós rekomenda ba KI atu estabelese estrutura salarial ba ajentes administrasaun bazeia estatutu no vizaun KI nian, maibé promete sei buka hatene kabementu legal kona-ba estrutura salarial hafoin informa ba Konsellu Imprensa.