Kuarta feira, 05 Juñu 2019 – Prezidente Komisaun Funsaun Públika, Faustino Cardoso Gomes hasoru malu ho Primeiru Ministru, Taur Matan Ruak hodi entrega relatóriu anual KFP 2018 no relata mós atividade jornada lao tuir ain fatin ba saudozu Nicolau dos Reis Lobato ne’ebé mak sei hala’o husi Turiscai ba to’o Laclubar.
Hafoin enkontru Prezidente KFP, Faustino Cardoso Gomes liu husi entrevista ho jornalista sira iha Palasiu Governu, esplika katak, iha enkontru ne’e nia entrega relatoriu anual KFP tinan 2018 ba Primeiru Ministru, Taur Matan Ruak no atualiza mós informasaun kona-ba jornada lao tuir ain fatin ba saudozu Nicolau dos Reis Lobato ne’ebé mak sei realiza iha fulan ne’e.
Foto : Media CFP
“Ohin hasoru malu ho Primeiru Ministru hodi entrega relatoriu anual KFP 2018 no atualiza mos informasaun kona-ba atividade KFP ho ekipa avansada hodi halo jornada lao tuir ain fatin ba saudozu Nicolau dos Reis Lobato husi postu administrativu Turiskai-Manufahi to’o postu administrativu Laclubar -Manatuto hodi identifika fatin, ne’ebé maka iha inisiu fulan jullu mai sei envolve funsionariu barak hodi halo jornada lao tuir ain fatin ba Prezidente Nicolau dos Reis Lobato ho objetivu katak, atu fo biban ba funsionariu hodi hatene istória eroi sira nian no situasaun ne’ebé povu infrenta iha área neba no bele banati tuir espíritu serví no prinsipiu sira ne’ebé maka eroi sira husik hela”, dehan Faustino Cardoso Gomes, iha Palasiu Governu, Dili.
Komisaun mós atualiza kona-ba nomeasaun ba kargu diresaun xefia iha VIII Governu Konstitusional bazeia ba estrutura lei organika ministeriu sira nian ne’ebé maioria promulga ona husi Prezidente Repúblika, ida seluk infora mós kona-ba preparativus promosaun ba funsionariu sira ne’ebé tuir planu sei realiza depois komemorasaun loron nasional Funsaun Públika iha loron 15 fulan jullu tinan 2019 no ikus liu informa mós kona-ba preparasaun distinsaun no premiu ba funsionáriu sira ne’ebé durante ne’e hatudu prestasaun servisu diak, exelente iha servisu fatin.
KFP mós sei prepara proposta dekretu lei Forsa Traballu atu regula mós funsionariu kazuais sira, hanesan polémika MEJD ne’ebé hapara kontratu.
“Funsionariu kazuais laos deit iha Misteriu Edukasaun maibé kuaze akontese iha Ministeriu hotu no tuir dadus husi payroll, funsionariu kazuais hamutuk seis mil resin, tamba ne’e iha enkontru ne’e Komisaun mós hato’o solusaun balun ba S.Exa. Primeiru Ministru, laos ba kazuais iha ministeriu edukasaun, maibé ba funsionariu kazuais iha Ministeriu hotu, tamba ne’e tempu badak KFP sei aprezenta proposta dekretu lei ida kona-ba planeamentu forsa traballu iha neba artigu ida koa’lia kona-ba solusaun ba funsionariu kazuais sira no mós ajensia Administrasaun Públika sira. Maibé partikularmente koa’lia situasaun funsionariu iha Ministeriu Edukasaun ne’e depende polítika Ministeriu nian, tamba kontratasaun funsionariu kazuais kabe ba ministeriu ida-idak nian kompetensia, atu deside kontinua extende ka la extende. Ita haree iha Ministeriu Edukasaun nian ne’e tamba laiha extensaun ba kontratu no depende polítika Ministeriu nian e Komisaun Funsaun Públika lahatene tamba la registadu iha baze dadus tamba funsionariu sira selu ho osan bens de servisu,” dehan Prezidente KFP.