Asiduidade no pontualidade, dever sentidu síviku nu’udar sidadaun presta ona iha eleisaun parlamentar nian, ne’ebé iha okaziaun ne’e Prezidente KFP husu ba funsionáriu sira atu nafatin servisu ho profisionál hodi asegura no serbí ho di’ak, destaka Prezidente KFP iha serimónia isar bandeira iha segunda feira, (05/06/2023) iha resintu Komisaun Funsaun Públika, Matadouro, Díli.
“Primeiru pontu isar bandeira ohin ne’e atu destaka di’ak liu tan ita nia onra no omenajen ba éroi sira atu oinsá bele banati tuir prinsípiu no valor sira ne’ebé mak sira husik hela hodi ita mós bele prontu sai éroi iha etapa ukun rasik-an ninian, segundu, iha kontekstu ida ne’e mak ha’u tenta atu destaka atensaun ba asuntu asiduidade no pontualidade, iha tempu hirak ida ha’u sempre destaka ami sempre foti atensaun haree oinsá mak kumpri nafatin kona-ba dever nu’udar funsionáriu no funsionária públika, ne’ebé keta haluha asiduidade no pontualidade servisu. Terseiru, husu ba asegura livre husi ahi suar (Tabaku) iha fatin servisu ne’e, la’ós saúde de’it maibé, mós implika ba iha dezempeñu servisu, ne’ebé husu konsensia ida-idak responsabilidade ba sira ne’ebé kompetente atu asegura komprimentu ba kestaun ne’e ba imi nia saúde, ba instituisaun nia saúde, ba maluk servisu sira nia saúde no ba ezijensia atende interese públiku tuir dezempeñu ida-idak ninian, tanba ne’e husu atu haree didiak kestaun ida ne’e atu la mosu irregularidade,” destaka Prezidente KFP, Faustino Cardoso Gomes.
Prezidente Komisaun Funsaun Públika, Faustino Cardoso Gomes husu nafatin Komisaun Funsaun Públika tenke sai ezemplar iha fatin servisu, fatin dezempeñu profisionalizmu, fatin atendimentu evita diskusoens, evita observasoens, evita prezumsoens, evita espekulasoens kona-ba kestaun polítika liu-liu ho vinda IX Governu Konstitusional.
“Ha’u fó hanoin Komisaun Funsaun Públika la’ós fatin atu promove imi nia interese polítiku sira ne’e, maibé promove espíritu dezempeñu profisionalizmu ne’ebé la haree ba kor polítiku se de’it, vota hotu tiha haluha tiha ona oinsá servisu profisional. Atu vota ba kor metan, mutin, kinur, matak, mean ka urusan, maibé, kuandu iha servisu fatin haree liu ba interese públiku ninian, haree liu ba profisionalizmu. Ha’u alerta de’it, ita sai ezemplar nafatin no Governu se de’it mak mai ita prontu atu serbí, la haree ba kor saida de’it ne’e mak profisionalizmu,” alerta Prezidente KFP.
Serimónia isar bandeira ne’e organiza husi Diresaun Nasional Étika, Disiplina no Prosedimentu Administrativa Funsaun Públika.
