Prezidente Komisaun Funsaun Públika, Agostinho Letêncio de Deus iha programa entrevista eskluziva iha Ajénsia Tatoli I.P hodi ko’alia kona-ba planu prioridade Komisaun Funsaun Públika ba tinan 2024 nian no ba oin.
Iha entrevista ne’e bazeia ba planu prioridade mandatu dahaat nian durante periodu 2024-2028 nian ne’ebé mak foku liu ba diagnóstiku ba ministériu no instituisaun Estadu sira, digitalizasaun sistema Funsaun Públika ne’ebé kontinua aposta, E-recruitment, servisu atendimentu ba públiku, formasaun no kapasitasaun, jestaun dadus iha Funsaun Públika, dezenvolvimentu kompeténsia liu husi nesesidade servisu, sistema kareira hodi kontinua mellora prestasaun ida di’ak ba servisus públikus inklui lei reforma obrigatóriu ba funsionáriu sira. Alende ne’e reforma mós ba Administrasaun Públika no Komisaun Funsaun Públika rasik.
Prezidente KFP esplika, iha tempu besik KFP sei halo diagnóstiku ba liñas ministeriais no instituisaun Estadu sira balun inklui munisípiu balun hodi haree direta kona-ba totál forsa traballu, nesesidade institusional, kualidade abilitasaun akademiku, lei orgánika ministerial, tendensia hamosu instituisaun EP no IP sira ho ninia natureza servisu sira inklui jestaun rekursu umanus hodi bele iha fulan marsu nia laran aprezenta hikas iha Konsellu Ministrus, nune’e hodi bele define priproridade sira hodi solusiona problema sira ne’e ba bem estar funsionárius no mós presta atendimentu ida di’ak ba públiku.
Bazeia ba dadus ne’ebé dadus ezistente ho idade reforma iha 4 mil ital mak ho idade reforma maibé seidauk bele reforma, maioria mai husi edukasaun eh professores, ne’ebé mak to’o agora seidauk iha lei reforma obrigatória. Tanba ne’e iha mandatu KFP ba dahaat nian kontinua atu aposta ba kestaun ne’e hodi haree ba reforma nian ne’ebé mak komisaun iha planu atu haree wainhira funsionáriu atu reforma pelo menos iha subsidiu ruma hodi bele reforma ho dignu, dehan Prezidente KFP, Agostinho Letêncio de Deus.
Nia mós esplika kona-ba polítika formasaun no kapasitasaun ba funsionáriu públiku no ajente administrasaun públika sira kontinua sai prioridade ba IV mandatu CFP.
“Abilidade, koñesimentu espesializada no área jeral sira, formasaun karakter, étika no moral, koñesimentu ba kestaun sira ne’e sei haree hamutuk iha polítika formasaun no kapasitasaun KFP sei servisu hamutuk ho FDCH no INAP hodi bele koordena ona ho instituisaun no sentru formasaun sira no universidade hodi bele aposta iha área kompeténsia sira atu kontinua mellora formasaun no kapasitasaun ba funsionárius públikus sira.
Prezidente KFP mós fó mensajen ba funsionárius sira presta servisu ho di’ak dalan importante mak ita presiza haree no koñese didiak ita nia deskrisaun servisu hodi hala’o servisu ho mellor, dedika aan ho profisional, ho kualidade, transparente no imparsial ba ita nia komunidade sira.
