Domingu, 27/03/2022 – Prezidente Komisaun Funsaun Públika, Faustino Cardoso Gomes partisipa serimonia aniversáriu Polisia Nasional Timor Lorosa’e (PNTL) ba dala 22 ho tema “PNTL prontu hametin Lei no Ordem ho Imparsial no neutral hodi prevene krime iha Estadu Direitu Demokratiku”.
Prezidente Repúblika, Francisco Guterres Lu Olo iha nia diskursu, husu ba Polisia Nasional Timor-Leste atu kontinua esfrosu hodi halo servisu ho professional, respeitu direitus umanus hodi bele asegura seguransa hakmatek ba sidadaun sira no asegura seguransa iha área Fronteira.
Xefe Estadu mós husu atu kontinua halo kooperasaun ne’ebé di’ak ho nasaun parseiru sira atu kontinua fó formasaun no kapasitasaun hodi profesionaliza servisu PNTL nian atu asegura seguransa ne’ebé hakmatek iha Timor-Leste hodi kontribui ba prosesu dezenvolvimentu nasional.
Entretantu Komandante Jeral PNTL Komisáriu, Faustino da Costa durante nia diskursu hateten, bazeia relatáriu PNTL nian hatudu kazu krimi no violénsia doméstika tun entre pursentu 9 to’o pursentu 11 kompara ho tinan hirak ba kotuk tanba, konsiensia komunidade kontribui ba redusaun ba kazu krimi.
Komisáriu Faustino da Costa mós rekoñese katak, movimentu ilegal iha Fronteira kontinua akontese maibé, konsidera hahú númeru ne’ebé kiik, tanba ne’e husu ba parte hotu liu-liu juventude grupu arte marsias atu kontribui ba parte Polisia hodi asegura seguransa ne’ebé hakmatek, paz no estabilidade hodi kontribui ba prosesu dezenvolvimentu nasional.
Faustino da Costa promete sei kontinua fó prioridade ba programa formasaun ba membru PNTL liu husi kooperasaun nasaun parseiru sira durante ne’e atu hasa’e kapasidade membru PNTL nian atu mellora servisu di’ak liu ba komunidade.
Serimonia aniversáriu PNTL ba dala 22 konta ho partisipasaun eis prezidente José Manuel Ramos Horta, Sua Exa. Primeiru Ministru no membru Governu balun, Sua Exa. Prezidente Parlamentu Nasional ho membru Parlamentu Nasional, Sua Exa. Prezidente Tribunal Rekursu, korpu Diplomátiku, brigadeiru jeneral Falur Rate Laek, adidu Polisia no Militar husi Portugal, China, Austrália no Indonézia iha Timor-Leste, organizasaun sosidade sivil Nasional no Internasional balun inklui komunidade. Serimonia aniversáriu ba dala 22 hahú ho misa agradesimentu no iha sábadu, (26/03) kari aifunan iha monumentu Mártires PNTL iha Caicoli, Dili.
Iha serimonia aniversariu ne’e halo mós inspozisaun kondekorasaun hodi entrega sertifikadu lovour ba Salvador Pires, Mauhoka ne’ebé durante ne’e kontribui halo konstrusaun ba postu Polisia tranzitu iha kapital Dili.
Alende ne’e entrega mós taxa ba manan nain sira membru Polisia no F-FDTL ne’ebé partisipa iha kompetisaun desportu dada tali no kompetisaun tiru alvu feto no mane.
