HANOI, VIETNAME — 5–7 OUTUBRU 2026; Prezidente Komisaun Funsaun Públika (KFP), Sr. Agostinho Letêncio de Deus, hamutuk ho delegasaun, partisipa iha 2026 International Forum on Public Governance, ho tema “Inclusive Governance in a New Development Era: System Transformation, Innovation and Future-Ready Government”, nebe organiza husi Academy of Public Administration and Governance (APAG), Vietname hamutuk ho organizasaun internasional no regional hanesan Chandler, Australian Aid, UNDP, UN DESA, Canadian bureau for International Education no Orgaizasaun sira ne’ebe hamahan-an iha EROPA.
Forum ne’e iha loron dahuluk abertura no aprezentasaun péritu administrasaun publika no politika públika iha Ho Chi Minh National Academy of Politics (HCMA), loron daruak EROPA Council Meeting no panel discussion no loron datoluk kontinua ho panel discussion no enceramento iha Academy of Public Administration and Governance (APAG).
Fórum internasionál ne’e fó plataforma ba diálogu dezenvolvimento administrasaun públika, desentralizasaun no polítika públika. Momentu ne’ebé involve troka esperiénsia entre lider, prátikante, akademiku no parseiru internasionál sira. Fóku prinsipal mak transformasaun institusionál, inovasaun, transformasaun dijitál no dezenvolvimentu governu ne’ebé preparadu atu responde ba dezafiu sira iha futuru.
Fórum ne’e halibur liu husi 500 partisipante hosi nasaun 20 resin, inklui reprezentante governu, peritu, akademiku no organizasaun internasionál sira, inklui Nasoens Unidas (ONU), UNDP no EROPA. Iha sesaun plenária, diskusaun fó atensaun boot ba utilizasaun Inteligénsia Artifisiál (AI) no dadus hodi moderniza administrasaun públika, hamenus burokrasi, hasa’e efisiénsia no hadi’a prosesu tomada desizaun bazeia ba evidénsia.
Iha loron segundu, durante EROPA Council Meeting, ne’ebé partisipa hosi 11 Estadu membru, Timor-Leste ofisialmente sai membru foun hosi Eastern Regional Organization for Public Administration (EROPA). Iha ninia intervensaun, Prezidente KFP hato’o agradesimentu espesiál ba Vietname nu’udar nasaun uma-na’in, Ho Chi Minh National Academy of Politics (HCMA) no Sekretariadu EROPA, ba apoiu no kolaborasaun durante prosesu adezaun Timor-Leste.
Prezidente KFP subliña katak konfiansa ne’ebé membru sira fó ba Timor-Leste sai motivasaun importante atu kontinua promove reforma administrasaun públika ne’ebé inklusiva, transparente, eficiente no preparadu ba futuru, ho objetivu atu hadi’a qualidade servisu públiku no responde di’ak liután ba nesesidade povu. Partisipasaun Timor-Leste iha fórum ne’e, ho akompañamentu hosi Embaixador Extraordináriu no Plenipotensiáriu Timor-Leste ba Repúblika Sosiál Vietnam, Sr. João Pereira, hatudu kompromisu Estadu Timor-Leste nian atu kontinua moderniza administrasaun públika. Esperiénsia no koñesimentu ne’ebé hetan hosi fórum ne’e sei sai baze importante atu konsidera no aplika iha sistema administrasaun públika nasional, liuliu iha área governansa di’ak (good governance), transformasaun dijitál, inovasaun no dezenvolvimentu kapasidade institusionál, hodi fortalece kapasidade Governu atu responde ba nesesidade povu no promove dezenvolvimentu sustentável iha futuru.
