Kinta-Feira, 14 Fevereiru 2019 – Prezidente Komisaun Funsaun Públika, Faustino Cardoso Gomes sai orador ba iha programa retiru anual Centru Logistíco Nacional (CLN) hodi koa’lia kona-ba dever, direitu funsionários públikus sira nian.
CLN iha funsionarius hamutuk 83 kompostu husi funsionariu permanente hamutuk 26 no funsionariu kazuais 57 ne’ebé mak durante ne’e servisu hodi iha instituisaun ida ne’e.
Iha aprezentasaun ne’e Prezidente, Faustino Cardoso Gomes esplika kona-ba kategorizasaun funsionalizmu kareira funsionariu permanentes, kargu diresaun no xefia, direitus, deveres no jestaun rekursus umanus iha funsaun públika.
Alende ne’e funsionarius sira aprezenta kestaun sira hanesan eskalaun no avaliasaun dezempeñu, kontratu ba kazuais sira, no levanta mós kestaun seluk ne’ebé liga ho kestaun saláriu no kestaun seluk liga ho ambiente servisu CLN nian ne’ebé mak durante ne’e funsionariu sira enfrenta.
Hatan ba kestaun sira ne’e Prezidente esklarese katak, husi Komisaun fahe esperensia ba malu, alerta ba malu, atualiza ba malu ba saida mak liga ho jestaun rekursu umanus, no Komisaun mós iha reuniaun regular ho DJ sira no jestores rekursus umanus liga ho kestaun sira ne’ebé mak enfrenta no kestoens sira ne’ebé mak funsionariu sira enfrenta liga ho dezempeñu, responsabilidade, imparsial, isentu no dever sira.
Alende ne’e iha mós aprezentasaun husi Komisaun Anti Korupsaun (KAK) kona-ba Siklu Korupsaun iha oportunidades, ameasas no sansaun, liga ho servisu funsionarius públikus iha servisu fatin no oinsa prevene no kombate asaun korupsaun atu labele mosu iha Centro Logistica Nacional.
Atividade retiru ne’e hala’o iha IADE, Mandarin.
