Prezidente KFP Sai Orador Iha Enkontru Diretores, Inspetores Eskolares Husi MEJD

Prezidente Komisaun Funsaun Públika, Faustino Cardoso Gomes sai palestrante iha enkontru formasaun no avaliasaun servisu nian ho inspetores eskolas, superintendente no diretor sira hodi partilla hanoin sira ligadu ho tema kona-ba kontrolu internu iha âmbitu boa jestaun iha administrasaun públika.

Nu’udar dever funsional ida-idak nian kona-ba kontrolu interna no jestaun di’ak iha Administrasaun Públika, wainhira ko’alia kona-ba jestaun di’ak ne’e sai hanesan prinsipiu fundamental ida husi konstituisaun, leis, instrumentu legal sira ne’ebé asegura husi ninia funsionamentu, transparansia, iha akontabilidade, planeamentu ida di’ak, onestidade, profisional ne’e hola parte husi jestaun di’ak, hateten Prezidente KFP iha segunda feira, (19/12/2022) iha salaun Ian Martin INFORDEPE, Balide, Díli.

Estadu hatu’ur ona sistema ida kontrolu interna alende kontrolu esterna, sistema ne’e asaun ida atu akompaña no haree oinsá halo melloramentu kontinue tuir situasaun ida-idak ninian hodi hatan ba ezijensia prinsipiu Governasaun di’ak, wainhira boa governasaun ne’e la’o di’ak sei la hamosu dúvidas ba benefisiariu iha sosiedade sira leet, no sei la mosu deskonfiansas entre autores sira iha prosesu ne’e. Ba realizasaun boa governasaun ne’e bele la’o ho efisiensia, efikaz ho elementus regras, prosedimentus sira oinsá ho papel kontrolu interna ida di’ak iha âmbitu ida ne’e, esplika Prezidente KFP, Faustino Cardoso Gomes ba inspetores eskolares no superintendente sira Ministériu Edukasaun Juventude no Desportu iha salaun INFORDEPE, Balide.

Durante KFP ninia vizitas mós ba eskolas sira balun la iha jestaun ida di’ak, mezmu iha fasilidades kompletu, ida ne’e presiza iha lideransa ida ne’ebé iha kapasidade hodi orienta, jere no jestaun rekursu umanus ida ho di’ak. Tanba ida ne’e koretamente Komisaun haree oinsá ninia funsionamentu dezempeñu iha prátika sira, haree ba situasaun salas de aulas, casa de banho, bibliotecas, merendas escolares ninia dezempeñu no efisiensia, efikasia no funsionamentu kontrolu internu estabalese ona no reprezenta husi superitendentes no inspetores eskolares sira nia servisu hodi haree maibé na realidade ida ne’e komisaun haree seidauk másimu informa Prezidente KFP.

Nune’e iha oportunidade ne’e Prezidente KFP husu ba diretores, inspetores eskolares no superintendentes sira hodi haree oinsá halo jestaun ida di’ak.